Fyrirtækið Wolt hagnaðist um rúmlega 107 milljónir króna í fyrra og nærri tvöfaldaði tekjur sínar á milli ára. Heildartekjur fyrirtækisins námu rúmlega 1240 milljónum króna en höfðu verið rúmlega 630 milljónir árið á undan. Stjórn félagsins er ánægð með tekjuvöxt og arðsemi félagsins í fyrra. Þetta kemur fram í nýbirtum ársreikningi Wolt sem skilað var til ársreikningaskrár Ríkisskattstjóra þann 15. september.
Wolt er fyrirtæki sem sérhæfir sig í heimsendingum á mat og neysluvörum til fólks og fyrirtækja. Wolt á Íslandi er íslenskt dótturfélag innan alþjóðlegu Wolt-samstæðunnar og er hluti af bandarískri fyrirtækjasamstæðu sem heitir DoorDash. Wolt var upphaflega stofnað í Finnlandi árið 2014 og er nú starfrækt út um allan heim. Árið 2022 var Wolt-samstæðan keypt af áðurnefndu stórfyrirtæki Doordash, sem er skráð á hlutabréfamarkað í Bandaríkjunum.
Sendlar lögðu niður störf
Mikil umræða hefur verið um Wolt síðustu daga eftir að sendlar sem starfa hjá fyrirtækinu lögðu niður störf vegna þeirra launa sem þeir fá sem verktakar í störfum sínum fyrir félagið. 60 sendlar Wolt lögðu niður störf á miðvikudaginn og söfnuðust saman fyrir utan skrifstofur Wolt í Ármúla, líkt og fréttastofa greindi frá.
Einn af sendlunum, Gheorhhe Miha, sagði við fréttastofu að laun sendlanna hefðu lækkað um helming frá því í byrjun árs: „Við fáum um helmingi minna greitt en við gerðum í byrjun þessa árs. Það sem gerðist er að Wolt byrjaði að lækka launin mánaðarlega. Við viljum vita hvers vegna. Sendingarkostnaðurinn hefur ekki lækkað og heldur ekki verðið á matnum en samt er verið að refsa okkur og við vitum ekki af hverju.“
Verkalýðsforystan hefur blandað sér í umræðuna um launakjör sendla Wolt og sagði Sólveig Anna Jónsdóttir, formaður Eflingar, í fréttum í gær að kjaraskerðing sendlanna væri til skammar. Í heildina starfa um 600 sendlar í verktöku fyrir Wolt á Íslandi.
Stjórnendur Wolt hafa í tilkynningu sagt að greiðslur til sendlanna hafi haldist stöðugar síðastliðið ár og taka ekki undir að kjaraskerðing sendlanna sé eins mikil og þeir halda fram.
Í tilkynningu frá félaginu sagði orðrétt: „Við hjá Wolt ítrekum að við tökum áhyggjum sendla alvarlega. Gögn okkar sýna þó að greiðslur fyrir hverja sendingu hafa að jafnaði haldist nokkuð stöðugar undanfarið árið. Greiðslur fyrir einstaka sendingar eru mismunandi og ráðast meðal annars af vegalengd, stærð pöntunar og áætluðum afhendingartíma. Minniháttar breytingar hafa verið gerðar með reglulegum hætti á greiðslufyrirkomulaginu og eru þær alltaf kynntar sendlum fyrirfram.“
Stjórnin telur afkomuna sýna þroska Wolt
Í ársreikningi Wolt fyrir síðasta ár kemur fram að stjórn félagsins er ánægð með rekstur félagsins og telur að rekstrarafkoman sýni aukinn þroska fyrirtækisins á Íslandi. Þar stendur orðrétt: ,,Félagið hélt áfram vexti sínum á árinu og skilaði traustum tekjuvexti og arðsemi. Vöxturinn var aðallega knúinn áfram af auknum fjölda pantana, áframhaldandi fjölgun söluaðila og viðskiptavina og víðtækari notkun Wolt-vettvangsins um allt Ísland. Félagið hélt einnig áfram að styrkja rekstrargetu sína og bæta skilvirkni innan félagsins. Stjórnin telur að afkoma félagsins endurspegli aukinn þroska Wolt-vettvangsins á Íslandi, vaxandi eftirspurn neytenda eftir þægindaþjónustu og áframhaldandi þróun samstarfs við veitingastaði, smásöluaðila og aðra söluaðila.“
Út frá ársreikningi Wolt og skýrslu stjórnarinnar er ljóst að þjónusta fyrirtækisins nýtur aukinna vinsælda á Íslandi. Til samanburðar við meira en 100 milljóna hagnað í fyrra var tæplega 30 milljóna króna tap á rekstrinum árið 2025. Viðsnúningurinn á milli ára er því mikill, bæði í tekjum og hagnaði.
Stjórn Wolt gerir ráð fyrir að þessi vöxtur í rekstrinum haldi áfram, líkt og kemur fram í skýrslu stjórnarinnar. „Hugsað til framtíðar gerir stjórnin ráð fyrir áframhaldandi vexti í rekstri félagsins, studdur af frekari útbreiðslu á núverandi mörkuðum, stækkun þjónustuframboðs og áframhaldandi fjárfestingum í viðskiptavinaupplifun og rekstrarhæfni. Þótt stjórnendur telji að markaðurinn fyrir matarsendingar sé að verða þroskaðri á Íslandi, sjá stjórnendur möguleg tækifæri til framtíðarvaxtar í gegnum matvöru-, smásölu- og aðra afhendingarþjónustu, sem og með stöðugri hagræðingu á afhendingarsvæði og úrvali söluaðila.“
