Landsréttur hefur snúið við dómi héraðsdóms í máli fyrrverandi deildarstjóra öryggis- og réttargeðdeildar Landspítalans og gert embætti landlæknis og íslenska ríkinu að greiða honum 800 þúsund krónur í miskabætur fyrir brot á persónuverndarlögum.
Deildarstjórinn fyrrverandi taldi embættið ekki hafa mátt upplýsa Geðhjálp um að hann hefði verið sendur í ótímabundið leyfi.
Forsaga málsins er sú að Geðhjálp sendi embætti landlæknis bréf í nóvember 2020 þar sem embættið var upplýst um að fimm þáverandi og fyrrverandi starfsmenn öryggis- og réttargeðdeildar hefðu vakið athygli samtakanna á misbresti í meðferð sjúklinga.
Í maí 2021 birti RÚV frétt þar sem fram kom að embætti landlæknis hefði til athugunar alvarlegar ábendingar um slæman aðbúnað á deildinni. Daginn eftir ræddi fréttastofa við þrjá fyrrverandi starfsmenn sem gagnrýndu stjórn deildarinnar harðlega.
Í lok maí sendi embætti landlæknis Geðhjálp bréf þar sem samtökin voru upplýst um úrvinnslu erindisins. Þar kom meðal annars fram að að mati embættisins hefðu stjórnendur Landspítalans unnið vel úr málum og lagt fram áætlun um úrbætur.
Þar sagði einnig að deildarstjórinn væri kominn í ótímabundið leyfi og að annar hefði tekið við starfi hans. Sama dag birtist frétt á RÚV um að deildarstjóri öryggis- og réttargeðdeildar væri kominn í leyfi frá störfum.
Deildarstjórinn taldi miðlun Landlæknisembættisins á upplýsingum um að hann væri kominn í leyfi frá störfum vera ólögmæta og að með miðlun upplýsinganna hefði verið vegið að einkalífi hans og æra hans höfð að engu.
Eins og áður segir var embætti landlæknis sýknað fyrir héraðsdómi, en hann taldi upplýsingagjöfina hafa átt stoð í upplýsingalögum. Landsréttur var því ekki sammála enda hefði Geðhjálp ekki óskað eftir þessum upplýsingum. Þá hafi staða deildarstjórans ekki verið til skoðunar hjá landlækni, heldur hjá Landspítalanum, og upplýsingar um leyfi hans því ekki hluti af málsgögnum embættis landlæknis. Því hafi engin lagaskylda hvílt á embættinu um miðlun upplýsinganna.
Samkvæmt málatilbúnaði deildarstjórans var upplýsingamiðlunin til þess fallin að valda honum ótta um að upplýsingarnar bærust víðar og yrðu tilefni neikvæðrar, opinberrar umfjöllunar um störf hans. Landsréttur taldi þann ótta á rökum reistan, en deildarstjórinn taldi að embætti landlæknis ætti einnig að bæta tjónið sem hlaust af þeirri opinberu umfjöllun sem af henni leiddi og fór fram á 10 milljónir króna í miskabætur.
Landsréttur taldi ekki sannað að umfjöllun í fjölmiðlum mætti rekja til miðlunar landlæknis á upplýsingunum til Geðhjálpar, enda hefðu 13 dagar liðið frá því að deildarstjórinn var sendur í leyfi og þar til embættið sendi Geðhjálp bréf með upplýsingunum. Því verði að gera ráð fyrir að ýmsir innan spítalans hefðu búið yfir vitneskju um brotthvarf hans úr starfi og ekki hægt að útiloka að frétt RÚV hefði byggst á upplýsingum frá öðrum en Geðhjálp.
