Egill Helgason fjölmiðlamaður gerir grín að frétt Vísis og segir hana falla í sama flokk og ýmsar aðrar fréttir sem honum þykja vart fréttnæmar.
Fréttin byggði á dagbók lögreglu þar sem fram kom að tilkynnt hefði verið um einstakling sem stundaði sjálfsfróun í runna fyrir framan ungmenni í Breiðholti eða Kópavogi. Lögregla fór á vettvang til að rannsaka málið en ekki kom fram hvort maðurinn hefði fundist eða verið handtekinn.
Egill deildi skjáskoti af fréttinni á Facebook og rifjaði upp önnur dæmi um fréttir sem hann telur hafa verið af svipuðum toga.
„Ýmislegt kemst í fréttir á Íslandi sem myndi kannski ekki teljast fréttnæmt meðal stærri þjóða. Ég minnist fréttarinnar um leikfimitösku sem var stolið í Garðabæ og 0,1 gramms af hassi sem var gert upptækt á Ísafirði ásamt ‘tækjum og tólum til fíkniefnaneyslu’ eins og það hét ávallt í fjölmiðlum. Hér er frétt af Vísi sem fer beint í þennan ágæta flokk,“ skrifar Egill.
Undir færslunni velti einn lesandi því upp hvort gerandinn gæti verið innflytjandi. Egill vísaði því á bug að það skipti máli í þessu samhengi.
„Sé ekki alveg að þessi spaugsama færsla kalli á viðbrögð sem þessi. Við Íslendingar höfum ábyggilega verið einfærir um að fróa okkur í aldanna rás.“
Annar benti á sænska frétt um mann sem átti að hafa stundað sjálfsfróun á rafhlaupahjóli.
„Þetta er íþrótt sem krefst ákveðinnar leikni,“ svaraði Egill.
