Skipverjar á Bandero, skipi Paul Watson-samtakanna, segjast hafa óskað eftir leyfi til að sigla inn í lögsögu Íslands en ekki verið svarað. Þau hafi slökkt á staðsetningarbúnaði sínum þar sem skip Hvals hafi ekki haft kveikt á sínum.
Landhelgisgæslan yfirtók stjórn skipsins eftir að það nálgaðist Hval 9 á fimmtudaginn. Forstjóri Gæslunnar segir áhöfn Bandero hafa verið með ógnandi tilburði og kastað netum í skrúfu skipsins, sem sé mjög varasamt.
Þreytt og svöng þegar fréttastofu bar að garði
Áhöfnin á Bandero var bæði þreytt og svöng þegar fréttastofa náði tali af skipverjum upp úr hádegi. Bandero hefur elt hvalveiðiskip í nokkrar vikur út af Faxaflóa. Shannon Mann skipverji um borð kvaðst ekkert geta tjáð sig um atburðarásina á meðan á rannsókn lögreglu stendur.
„Ég get ekki rætt neitt tilvik 30. júlí því að rannsókn stendur yfir. Ég hef fengið fyrirmæli frá lögrfræðingi okkar að segja ekki neitt um málið.“
Hún vildi heldur ekki svara því hvort Bandero hefði siglt fyrir stefnu Hvals 9 eða aftrað för hans með öðrum hætti. Lögregla lagði hald á ýmsan búnað í gær, síma, minniskort, myndavélar og tölvur.
Gagnrýna framferði lögreglu og Landhelgisgæslunnar
Mann gagnrýnir framferði lögreglunnar og Gæslunnar í aðgerðunum. Hún segir lögfræðingi Paul Watson-samtakanna hafa verið meinað að fara um borð þar sem skipverjarnir hafi ekki sjálfir hringt í hann.
Símar hafi aftur á móti verið teknir af áhöfninni og því engin leið fyrir þau að hringja sjálf. Þeim hafi í staðinn verið úthlutað verjendum. Þá segir hún lögreglu hafa reynt að múta skipverjum með einu símtali í skiptum fyrir lykilorðin að símum þeirra.
Óvíst er hversu lengi áhöfninni verður haldið um borð, flest bendir til þess að það verði í það minnsta fram á þriðjudag. Beck Straussner, skipstjóri Bandero, óttast að það gæti verið lengur jafnvel 4-6 vikur eða á meðan á rannsókn málsins stendur. Hann segist þakkláttur fyrir alla þá hjálp sem hefur borist.
„Þetta hefur leitt okkur í aðstæður sem eru óþægilegar fyrir alla. Ég held að allir séu mjög þreyttir.“
Fréttastofa hefur reynt að ná tali af Kristjáni Loftssyni forstjóra Hvals hf. og boðið honum viðtal en hann hefur ekki orðið við þeirri beiðni.
