Í tillögu sviðsstjóra skóla- og frístundasviðs kemur fram að skólaaksturinn kosti um 450 þúsund á mánuði eða 4,1 milljón á ári miðað við að hann standi í níu mánuði. Áætlað sé að þetta skólaár séu 55 nemendur með lögheimili í Suðurhlíðahverfi og líklegt sé að fjórtán til sextán börn muni nýta skólaaksturinn í Hlíðaskóla að morgni samkvæmt upplýsingum frá skólastjóra. Allir nemendurnir búi innan fjarlægðarviðmiða reglna um strætókort, það er innan 1,5 km í 1. til 4. bekk og 2 km vegna nemenda í 5. til 10. bekk.
Þá segir að samkvæmt greiningu sé gönguleiðin fyrir nemendur úr Suðurhlíðum á bilinu 815–1390 metrar. Tekið er fram að það er mat skrifstofu skóla- og frístundasviðs að gönguleiðin sé ekki erfiðari en gengur og gerist í borginni. Að mestu sé gengið á göngustíg eða meðfram götu með 30 kílómetra hámarkshraða þar sem mikið er af hraðahindrunum og svo er farið um undirgöng, yfir ein ljós um hjólastíg og yfir gangbraut við grunnskólann.
Gangan taki 20 til 30 mínútur
Í umsögn skrifstofu samgangna og borgarhönnunar kemur fram að það megi áætla að það taki nemendur á bilinu 20 til 30 mínútur að ganga, fyrir þá sem lengst búa frá.
Ástand og öryggi gönguleiða sé að stærstum hluta sambærilegt við það sem gerist víða annars staðar innan hverfa borgarinnar. Hámarkshraði gatna sem þarf að þvera á plani er alls staðar 30 km/klst. Hámarkshraði á Bústaðavegi er 50 km/klst. en undirgöng eru undir Bústaðaveg við Birkihlíð þannig að ef gengið er í skólann þarf ekki að fara yfir Bústaðaveg.
Þá kemur fram að fyrir vetrartímabilið hafi skrifstofan lagt fram beiðni um hækkun forgangs snjómoksturs á stystu gönguleiðum milli Suðurhlíða og Hlíðarskóla og að honum ætti þannig að vera lokið fyrir klukkan átta á morgnana, í stað klukkan 12 eins og er núna. Með þessari breytingu metur skrifstofan að þörfin fyrir skólaakstur minnki samhliða þessari breytingu.
Þá er bent á í umsögninni að framkvæmdir við Veðurstofuhæð geti haft áhrif á aðgengi og ítrekað í umsögninni að byggingaraðilar tryggi viðunandi umferðaröryggi og gæði gönguleiða.
Skólaráð Hlíðaskóla tók þessa breytingu fyrir á fundi þann 14. ágúst á aukafundi.
„Skólaráð Hlíðaskóla harmar að skólaakstur leggist af en leggur áherslu á að tryggt sé að gönguleiðir úr Suðurhlíðum séu öruggar allt árið um kring og snjómokstri sé örugglega lokið fyrir skólabyrjun.“
Umsögn skólaráðs Hlíðaskóla
Samþykkja en árétta mikilvægi umferðaröryggis
Skóla- og frístundaráð fundaði á aukafundi í dag vegna málsins. Þar kemur fram að meirihlutinn styðji tillögu sviðsstjóra á grundvelli faglegs mats um öryggi gönguleiða og gildandi viðmiða um vegalengdir til skóla.
„Fyrir liggur að leiðirnar uppfylla þau skilyrði sem gilda um reglubundinn skólaakstur og að gripið verði til frekari öryggisráðstafana og umbóta á vetrarþjónustu á svæðinu. Mikilvægt er að ákvörðunin og framkvæmd hennar verði vel kynnt foreldrum og skólasamfélaginu og að fylgst verði náið með áhrifum breytingarinnar á ferðir barna til og frá skóla. Meirihlutinn leggur áherslu á að fylgst verði með framgangi málsins og þeim áskorunum sem kunna að koma fram eftir innleiðingu breytingarinnar og þeim verði mætt eins og hægt er,“ segir í bókun meirihlutans en Bjarni Fritzson, borgarfulltrúi Sjálfstæðisflokksins, er formaður ráðsins.
Sanna Magdalena Mörtudóttir, fulltrúi Vinstrisins, og Stein Olav Romslo, fulltrúi Samfylkingarinnar, gagnrýna ákvörðunina og stuttan fyrirvara hennar.
„Fyrir börn og sérstaklega þau yngstu er um talsverða vegalengd að ræða, allt að 1,4 kílómetra, sem áætlað er að taki börn sem búa lengst frá skólanum hátt í hálftíma að labba. Þó að vegalengdin sé innan fjarlægðarviðmiða sem gilda um reglubundinn skólaakstur, þá er vert að taka fram að fyrirhugaðar framkvæmdir við uppbyggingu á Veðurstofuhæð munu hafa áhrif á umferðarflæði sem og umferðaröryggi á svæðinu. Það liggur fyrir að um 15 börn myndu nýta skólaaksturinn á skólaárinu sem hefst eftir 3 daga. Því er um mjög skamman fyrirvara að ræða,“ segir í bókun þeirra og er bent á að samkvæmt reglum borgarinnar eigi að taka slíka ákvörðun fyrir 1. júlí hvert ár.
„Auk þess er kveðið á um að samþykki fyrir reglubundnum skólaakstri er ótímabundið og gildir nema forsendur breytist en við sjáum ekki að forsendur hafi breyst í þessu tilviki með tilliti til öryggis barna. Telja fulltrúarnir því mikilvægt að skólaaksturinn sé til staðar,“ segir að lokum.
