Héraðsdómur Reykjavíkur kvað upp dóm þess efnis í gær og birti í dag. Í honum segir að maðurinn, sem nú er á 24. ári, hafi verið ákærður fyrir að hafa í nokkur skipti á tímabilinu ágúst til október árið 2020 sett sig í samband við stúlkuna, sem þá hafi verið 12 ára, í gegnum samfélagsmiðla og mælt sér mót við hana í þeim tilgangi að áreita hana kynferðislega.
Í nokkur þeirra þeirra skipta sem hann hitti stúlkuna hafi hann kysst hana tungukossi auk þess sem hann hafi klipið að minnsta kosti einu sinni í rass hennar utanklæða.
Í niðurstöðukafla dómsins segir að dómurinn telji sannað að hafið sé yfir skynsamlegan vafa að maðurinn hafi gerst sekur um þá háttsemi sem honum var gefin að sök í ákæru, fyrir utan að hafa klipið stúlkuna í rassinn.
Játaði kossana
Þá segir að við ákvörðun refsingar sé litið til þess, manninum til málsbóta, að hann hafi játað að hafa kysst stúlkuna. Einnig sé horft til þess að ákærði var ungur þegar atvik gerðust eða á 18. ári. Þá sé langt um liðið síðan atvik gerðust, eða um sex ár, og um fjögur og hálft ár síðan rannsókn málsins hófst. Manninum verði ekki kennt um þann mikla drátt sem orðið hefur á meðferð málsins og hann sé að mestu óútskýrður.
Hins vegar sé horft til þess til refsiþyngingar að maðurinn hafi brotið á alvarlegan hátt gegn stúlkunni og brot hans hafi beinst gegn heilsu og velferð stúlkunnar, sem hafi verið á barnsaldri. Brotin hafi verið til þess fallin að hafa alvarlegar afleiðingar fyrir stúlkunna en hafi engu skeytt um ungan aldur og velferð hennar heldur látið eigin hagsmuni alfarið ráða ferðinni.
Engin refsing í bili en milljónir í kostnað
Með vísan til þessa og sérstaklega til þess hversu langt er liðið síðan brotin voru framin verði ákvörðun refsingar mannsins frestað skilorðsbundið í eitt ár.
Þá greiði maðurinn stúlkunni 800 þúsund krónur auk þess sem hann greiði þrjá fjórðu málsvarnarlauna verjanda og þóknun réttargæslumanns, sem séu alls fjórar milljónir króna, og 315 þúsund krónur í annan sakarkostnað.