Skipulögð mótmæli fara fram í meira en 50 borgum og bæjum á Spáni í dag. Mótmælin snúa að húsnæðismálum, ekki síst leigumarkaðnum.
Mótmælin hófust eftir að Maricarmen, 87 ára gömul kona, var borin út úr húsnæði sem hún hafði leigt áratugum saman í Madríd. Leigjendasamtök Spánar segja að það hafi myndast gjá sem ekki verði brúuð milli fólksins og flokkanna á þingi.
Tillögurnar sem Pedro Sánchez forsætisráðherra mælti fyrir í gær fela meðal annars í sér að leigusamningar myndu endurnýjast sjálfkrafa og sérstaka ráðstöfun til að koma í veg fyrir útburð leigjenda í viðkvæmri stöðu. Þá átti líka að banna útburð til ársins 2030 og setja reglur um tímabundna leigu og leigu á herbergjum.
Flokkur aðskilnaðarsinna í Katalóníu, sem ver ríkisstjórnina vantrausti, var á móti tillögunum en með andstöðu hans og hægri flokkanna í stjórnarandstöðu voru tillögurnar felldar naumlega.
Strax hefur verið þrýst á Sanchez að boða til kosninga. Samkvæmt lögum á að boða til þingkosninga eigi síðar en í ágúst á næsta ári.
Spænska dagblaðið El País hefur eftir heimildum að Sanchez sé að íhuga að boða til kosninga. Einnig hefur verið hvíslað um að hann hafi í einhvern tíma verið að bíða eftir rétta augnablikinu.
Sannleiksstundin runnin upp
Atkvæðagreiðslan á þinginu í gær var þannig að þingmenn réttu upp hönd og þannig þurfti hver og einn að gefa upp afstöðu sína. Sanchez er fastur fyrir og segist ekki ætla að draga tilskipanirnar til baka og skrifaði á X að sannleiksstundin væri runnin upp.
Mótmælaaldan fór af stað eftir að 87 ára gömul kona var borin út úr húsnæði sem hún hafði leigt áratugum saman í Madríd, þar sem hún hafði ekki lengur efni á að borga leiguna.
Fjárfestingafyrirtækið sem á íbúðina dró útburðinn til baka fyrr í þessari viku. Mótmælendur hafa meðal annars komið upp tjaldborg í miðborg Madridar.
