Formaður umhverfis- og skipulagsráðs segir ráðið vera að svara ákalli kjósenda með því að fella úr gildi deiliskipulag á Suðurlandsbraut. Þrengt hafi verið of mikið að umferð á svæðinu í hinu fellda deiliskipulagi og ekki tekið nægilegt tillit til atvinnurekstrar á svæðinu.
Þetta segir Guðný María Jóhannsdóttir, formaður Umhverfis- og skipulagsráðs, í samtali við mbl.is.
Umræðan um deiliskipulagið á Suðurlandsbraut var fyrirferðamikil í aðdraganda sveitarstjórnarkosninganna í maímánuði þar sem atvinnurekendur á svæðinu lýstu þungum áhyggjum af skipulaginu og áhrifum þess á starfsemi sína.
Að sögn Guðnýjar er staðsetning sérakreina fyrir Borgarlínu á meðal þess sem verður endurskoðað. Í hinu fellda deiliskipulagi eru akreinarnar fyrir miðju en skoðað verður hvort ákjósanlegra sé að hafa akreinarnar nær gangbrautum.
„Þannig gætum við tryggt umferðarflæðið þarna með sama hætti og er í dag og ekki verið að þrengja að umferð. Það sem gerist með því að þrengja að umferð þarna er að umferðin leitar inn í hverfin og það er auðvitað ekki það sem fólkið sem býr í hverfunum þarna í kring myndi vilja,“ segir Guðný.
Óhjákvæmilegt að framkvæmdir tefjist
Þá verður einnig skoðað hvort þörf sé á að hafa hjólastíga sitt hvoru megin við Suðurlandsbraut.
„Við þurfum að finna lausn á þessu en á sama tíma viljum við stórefla almenningssamgöngur og gera það vel. Þetta snýr að því að taka upp þetta skipulag og vinna það í sátt og samlyndi við þá sem eru að vinna að þessu verkefni sem við höfum kallað Borgarlínuverkefni.“
Aðspurð segir Guðný að unnið verði hratt og örugglega við gerð nýs deiliskipulags á svæðinu. Hún segir óhjákvæmilegt að framkvæmdir á svæðinu tefjist við að fella deiliskipulagið úr gildi.
„[...] en við höfum sýnt það fyrstu dagana að við vinnum hratt og örugglega og við ætlum okkur að gera það í þessu máli líka,“ segir Guðný.
Er einhver tímarammi kominn á nýtt deiliskipulag?
„Nei, við erum ekki komin það langt að geta sagt til um það hvenær við getum verið komin með nýja tillögu að deiliskipulagi fyrir svæðið.“
Sjálfstæðisflokkurinn lagði áherslu á það í aðdraganda kosninga að samgöngusáttmáli höfuðborgarsvæðisins yrði endurskoðaður heildstætt. Guðný segir að hafið sé samtal við Betri samgöngur um heildstæða endurskoðun á samgöngusáttmálanum.
Sátt um afgreiðslu málsins
Aðspurð segir hún samtalið ekki komið á það stig að hægt sé að segja til um hvaða svæði Borgarlínunnar verði tekin sérstaklega til skoðunar.
„Það er þessi hugmyndafræði um miðjusetningu alls staðar sem við munum taka til skoðunar og skoða betri útfærslur á [...]. Við teljum að það sé ekki besta lausnin á öllum svæðum eins og núverandi hugmyndir ganga út á. Það þarf bara að skoða hvert svæði fyrir sig, það getur vel verið að miðjusetning eigi rétt á sér á ákveðnum svæðum.“
Skiptar skoðanir voru á meðal samstarfsflokkanna í borgarstjórn í aðdraganda kosninga um hversu langt ætti að ganga í að endurskoða samgöngusáttmálann. Aðspurð segir Guðný að full sátt hafi verið á meðal fulltrúa meirihlutans í umhverfis- og skipulagsráði um að fella niður deiliskipulagið á Suðurlandsbraut.
Ýmisleg stór mál bíða afgreiðslu umhverfis- og skipulagsráðs næstu misseri og segir Guðný ljóst að líf og fjör verði í ráðinu næstu fjögur árin.
„Í kosningabaráttunni töluðum við fyrir því að við ætluðum að breyta um stefnu bæði í samgöngumálum og húsnæðismálum. Báðir þessir málaflokkar eru hjá umhverfis- og skipulagsráði þannig að það verður líf og fjör næstu fjögur árin.“
