Sigurður Björgvin, höfundur bókarinnar „Leitin að Geirfinni,“ segir að Geirfinnur Einarsson hafi verið skilinn við eiginkonu sína er hann lét lífið að kvöldi 19. nóvember árið 1974. Hann segir gögn frá Þjóðskrá staðfesta þetta.
Samkvæmt bók Sigurðar lét Geirfinnur lífið í átökum á heimili sínu kvöldið sem hann hvarf en opinber skýring lögreglu er að hann hafi horfið í kjölfar fundar við óþekktan mann í Hafnarbúðinni í Keflavík. Sigurður og aðrir aðstandendur bókarinnar hafa margítrekað lýst því yfir að lögreglan í Keflavík hafi vísvitandi afvegaleitt rannsókn málsins á hvarfi Geirfinns. Hafa þau án árangurs kallað eftir því að rannsókn málsins verði opnuð að nýju.
Segir Sigurður það vera sérkennilegt að ekkja Geirfinns hafi skömmu eftir hvarfið efnt til fjársöfnunar sér til handa og hafi framlög numið milljónum króna.
Sjá einnig: Hvetur Valtý til að fara í meiðyrðamál við sig því þá muni sannleikurinn í Geirfinnsmálinu koma fram
Sigurður segir í pistli á Facebook-síðu sinni:
„Samkvæmt upplýsingum frá Þjóðskrá árið 1980 voru Geirfinnur og Guðný skilin þegar hann lést 19. nóvember 1974. Þetta kemur fram á dánarvottorði Geirfinns, dags. 3. janúar 1980. Vottorðið er staðfest, stimplað og undirritað af starfmanni Hagstofunnar. Dánarvottorðið var lagt fyrir sem málsgagn í Guðmundar- og Geirfinnsmálinu á sínum tíma.
Við sem stóðum að bókinni Leitin að Gerfinni höfum látið leita í gögnum Þjóðskjalasafnnis sem varðveitir hjónaskilnaðarbækur frá bæjarfógetaembættinu í Keflavík fyrir árin 1959-1979 og fylgiskjöl hjónaskilnaðarmála frá sama tímabili. Þar eru engin gögn eða tilvísanir í að mál tengt Geirfinni og Guðnýju hafi verið tekið fyrir.
Hafi þau verið skilin, sem margt bendir til, er það sérkennilegt í meira lagi að Guðný hafi ráðist í afar umfangsmikla fjársöfnun í ársbyrjun 1975 til handa sjálfum sér. Þar safnaði hún milljónum króna sem var fáheyrt mikið á þessum tíma.
Guðný seldi einnig allar eignir Geirfinns áður en hann var úrskurðaður látinn. Þar hefur hún þurft undanþágu hjá fógetaembættinu í Keflavík eða fulltrúa fógeta. Hvort þessi pappír um skilnað þeirra hjóna tengist þeim gjörningum er óvíst. Kanski veit Valtýr eitthvað um þetta.
Myndin er úrklippa úr Morgunblaðinu 23. janúar 1975.“
