Guðmundur Kristjánsson, framkvæmdastjóri Brims, keypti nýverið útgerðina Þórsnes ehf. í Stykkishólmi. Hann á sterkar rætur til bæjarins.
„Afi og amma bjuggu í Stykkishólmi og ég var þarna í sveit á sumrin, oft. Svo hóf pabbi sína útgerð í Stykkishólmi 1956,“ segir Guðmundur. Hann segir fréttamanni að hann hafi keypt Þórsnes í gegnum „holding félag“ í sinni eigu.
Um 50 manns starfa hjá Þórsnesi þegar mest lætur. Félagið var áður í eigu Eggerts Bergmanns Halldórssonar, 15%, og Gunnlaugs Karls Hreinssonar, 85%, í gegnum félög þeirra E. Halldórsson ehf. og Austmar ehf. Eggert Bergmann verður áfram framkvæmdastjóri Þórsness en hann hefur rekið útgerðina um árabil.
Eggert segir það leggjast vel í sig að Guðmundur sé orðinn eigandi Þórsness.
„Gummi er náttúrulega ættaður héðan. Hann er Snæfellingur,“ segir hann fréttastofu.
Eigur Þórsness og tengd félög
Þórsnes á töluverðar fiskveiðiheimildir, bæði útgerðin sjálf og í gegnum félagið Sæfell ehf. sem er í 49,5% eigu Þórsness. Hlutdeild Þórsness af aflaheimildum til þorskveiða, sé tekið mið af tæpum helmingshlut í Sæfelli, er um 1,1%. Þá eiga félögin einnig töluverðar heimildir í fleiri fiskistofnum.
Rekstrartekjur Þórsness á síðasta ári voru rúmir 6 milljarðar samkvæmt ársreikningi og hagnaður 678 milljónir. Eignir félagsins, samkvæmt efnahagsreikningi, eru 8,7 milljarðar króna. Bókfært virði fiskveiðiheimilda félagsins er tæpir 3 milljarðar króna samkvæmt ársreikningnum.
Rekstrartekjur Sæfells voru 384 milljónir króna samkvæmt ársreikningi fyrir 2025 og hagnaður 206 milljónir. Eignir félagsins eru 4,7 milljarðar króna samkvæmt efnahagsreikningi.
Í síðasta mánuði var lagt til að Þórsnes ehf. skyldi greiða 1,5 milljarða króna í arðgreiðslur til hluthafa, eða fjórðung af árstekjum. Stjórn Sæfells lagði í maí til að félagið greiddi út 550 milljónir króna í arð. Eggert Bergmann er einnig framkvæmdastjóri þess.
Þórsnes ehf. á 49,5% í Sæfelli hf., 20% í Safír byggingum ehf. og 14,3% í Suðureyjum ehf. Síðastnefnda fyrirtækið er frumkvöðlasetur í Stykkishólmi.
Aðrir hluthafar í Sæfelli eru Gullhólmi ehf., 49,5%, og Hraðfrystihús Hellissands hf. sem á 1%. Sæfell á síðan 49% í félaginu agustson ehf. og 8% í ISEA ehf. Þá á Sæfell 100% í Útgerð Bíldseyjar ehf. en þar er að finna frekari fiskveiðiheimildir Þórsness.
Agustson er í fiskisölu og ISEA er í smíði skipa og annarra fljótandi mannvirkja. Stærsti eigandinn í ISEA er félagið Desarollo Agricola y Minero en það á rúma tvo þriðju í félaginu, 68%.
Hátt í þrjú þúsund tonna kvóti í félögunum
Aflamark (kvóti) ræðst af hlutdeild skips í leyfilegum heildarafla sem ráðherra gefur út hverju sinni og er breytilegur á milli ára.
Þórsnes ehf. fékk úthlutað samtals 1.415.202 þorskígildiskílóum í kvóta á yfirstandandi fiskveiðiári og Útgerð Bíldseyjar ehf. samtals 1.386.340 þorskígildiskíló.
Þórsnes á 0,26% hlutdeild í ýsu og 0,5% hlutdeild í skötusel. Samkvæmt stöðu aflamarks í dag á Þórsnes 1,3% hlutdeild í löngu og 1,2% í keilu. Afli sem fer umfram úthlutaðar veiðiheimildir er tekinn með í reikninginn þegar áætlaðar eru veiðiheimildir fyrir næsta veiðiár.
Bíldsey á 0,6% hlutdeild í ýsu og 1% hlutdeild í steinbít. Þá á útgerðin 0,6% hlutdeild í þorski.
Bæði félög fá einnig sérstakar úthlutanir. Það er aflamark sem er úthlutað til dæmis vegna byggðakvóta eða skel- og rækjubóta og viðbót við hlutdeildarúthlutun. Sérstakar úthlutanir Bíldseyjar eru ekki svo miklar en Þórsness eru töluverðar.
Hlutdeild Þórsness í Breiðafjarðarskel er 82,8% og sléttur helmingur í Húnaflóaskel, 50%.
Við spurðum Guðmund út í sérstaka úthlutun Þórsness.
„Það eru skelbætur sem eru eiginlega orðnar mjög litlar,“ segir hann. „En þetta fyrirtæki var í hörpuskel á sínum tíma.“
Best að heimamenn sjái um svona rekstur
Guðmundur segir fréttastofu að kaupin á Þórsnesi hafi borið tiltölulega hratt að.
„Sá sem er seljandinn, hann ræður alltaf. Svo ákveður hann bara hvort hann vill selja eða ekki,“ segir Guðmundur.
„Fyrst þetta tækifæri bauðst fannst mér alveg kjörið að fara með Eggerti í þetta.“
Hann hafi ekki lagst yfir það hvort hann ætli að taka beinan þátt í rekstri félagsins.
„Mín persónulega skoðun er sú að þeim mun meira sem heimamenn eru í svona rekstri, því betra. En auðvitað er ágætt að hafa svona fjárfesta í Reykjavík með sér. Ég er náttúrulega fæddur og uppalinn á Snæfellsnesi þannig ég þekki þetta alveg út og inn. En Eggert mun reka þetta. Ég er náttúrulega að verða 65 ára í sumar og orðinn svolítið gamall.“
Heldur þú að þú takir elliárin í Hólminum?
„Ég veit það ekki. Ég vil ekki vera að lofa neinu maður – svo verða allir pirraðir. Fæst orð minnst ábyrgð, er það ekki?“
