Ari Edwald, oddviti Miðflokksins í borginni, furðar sig á nýjum meirihluta. Áherslur flokkanna þriggja, Sjálfstæðisflokksins, Viðreisnar og Framsóknar, hafi verið mjög ólíkar og því hljóti samstarfið að fela í sér stefnubreytingar fyrir einhvern flokkanna þriggja. Ari segir að Sjálfstæðisflokkurinn hafi kosið að hunsa ákall kjósenda um breytingar og þess í stað gengið til samstarfs við flokka sem bera ábyrgð á þeirri stefnu borgarinnar sem kjósendur hafi hafnað. Þetta kemur fram í færslu oddvitans á Facebook.
„Í dag hefur verið kynntur nýr meirihluti í borgarstjórn, með aðild Sjálfstæðisflokks, Viðreisnar og Framsóknarflokks, sem hlýtur að fela í sér að einhverjir skipta um stefnu STRAX eftir kosningar, þar sem áherslur voru mjög mismunandi.“
Ari segir að niðurstöður kosninganna hafi fyrst og fremst ráðist af málum sem Miðflokkurinn setti fram af krafti, svo sem að auka framboð á hagkvæmu húsnæði, greiða leið borgarbúa í umferðinni og að hafna bruðli Borgarlínunnar.
„Við unnum stórsigur! Okkar sigur var jafn stór sigri Sjálfstæðisflokksins í prósentustigum og borgarfulltrúum, og enginn flokkur vann hlutfallslega stærri sigur en Miðflokkurinn sem margfaldaði fylgi sitt. Kjósendur veittu D og M hreinan meirihluta, 6 nýja borgarfulltrúa og skýrt umboð til langþráðra breytinga í borginni.“
Þrátt fyrir þennan sigur flokkanna tveggja hafi Sjálfstæðisflokkurinn ekki gengið til viðræðna við Miðflokkinn. Þess í stað var leitað til flokka sem beri ábyrgð á stöðu borgarinnar. Telur Ari að hér sé um svik við kjósendur að ræða.
„Sjálfstæðisflokkurinn kýs að hunsa það ákall kjósenda og efna til samstarfs við flokka sem bera ábyrgð á stefnunni sem var hafnað. Margir munu kalla það svik við kjósendur sem kusu breytingar. Viðreisn lagði mesta áherslu á það fram á síðasta dag kosningabaráttunnar að ekkert mætti hrófla við Borgarlínunni, sem Sjálfstæðisflokkurinn sagðist vilja endurskoða frá grunni! Annað er eftir því. Sjálfstæðisflokkurinn hefur á undanförnum árum afsakað vinstri áherslur í landsmálum með því að þar hafi verið málamiðlanir við VG. Nú er því ekki lengur til að dreifa, en áfram kýs flokkurinn að starfa til vinstri þótt hann hafi sögulegt tækifæri til að framkvæma sína stefnu í samhentum tveggja flokka meirihluta með sömu áherslur í helstu málum.“
Ari segir að hér hafi kosningaúrslitin verið sniðgengin og boðar aðhald Miðflokksins sem nú liggur fyrir að muni sitja í minnihluta borgarstjórnar.
„Við í Miðflokknum munum að sjálfsögðu veita nýjum meirihluta uppbyggilegt aðhald í þágu borgarbúa í von um að málin geti þróast eins vel og hægt er, miðað við þær óvæntu aðstæður að kosningaúrslitin eru sniðgengin. Ég vil að lokum þakka borgarbúum stuðninginn og traustið í nýafstöðnum kosningum sem og og öllu því góða og ötula fólki sem lagðist á árar með okkur í baráttunni fyrir betri Reykjavík.“
