Lögreglan á Suðurnesjum hefur gefið út ákæru á hendur Írisi Helgu Jónatansdóttur vegna umsáturseineltis, ásamt öðrum aðila sem er talinn eiga aðild að einstaka málsatvikum. 

Í ákærunni eru málsatvik rakin aftur til ársins 2022 og beinast gegn fjórum fullorðnum aðilum, þremur karlmönnum og maka eins þeirra, sem og börnum þeirra, fjölskyldum og tengdum aðilum. 

Listuð eru upp alls 68 málsatvik í ákærunni gegn Írisi Helgu sem varða ýmis brot á hegningarlögum, svo sem umsáturseinelti, rangar sakargiftir, skjalafals, hótanir, ærumeiðandi aðdróttanir og barnaverndarlagabrot. 

Hér á neðan má lesa ákæruna í heild sinni, en þar birtist mynd af áralangri hegðun sem er til þess fallin að meiða, særa og skaða aðra. 

Ákæran gegn Írisi Helgu

A

Gegn Írisi Helgu, fyrir umsáturseinelti, sem einnig fól í sér rangar sakargiftir, skjalafals, ærumeiðandi aðdróttanir og barnaverndarlagabrot, með því að hafa á tímabilinu frá 10. febrúar 2022 til 10. febrúar 2024, endurtekið sett sig í samband við, fylgst með, hótað og á annan sambærilegan hátt setið um a, fyrrverandi kærasta ákærðu, og b, kærustu og sambýliskonu a, og með þeirri háttsemi sinni valdið þeim hræðslu og kvíða, en ákærða beitti meðal annars eftirfarandi aðferðum við umsáturseineltið: 

A.I. 

Með því að hafa, á fyrrgreindu tímabili, endurtekið komið að og fylgst með heimili a, heimili b, og svo að sameiginlegu heimili a og b, meðal annars í eftirtöldum tilvikum; 

A.I.1. 

Með því að hafa, þann 26. febrúar 2022, komið að þáverandi heimili a, með krukku sem hún sagði að innihéldi fóstur sem hún hefði misst. 

A.I.2. 

Með því að hafa, þann 27. febrúar 2022, komið að þáverandi heimili a, og brotið þar blómavasa fyrir framan útihurð hússins, en blómavasann hafði a áður gefið ákærðu.

A.I.3. 

Með því að hafa, þann 1. mars 2022, komið að þáverandi heimili a, og sparkað í bifreið hans.

A.I.4. 

Með því að hafa, þann 17. janúar 2023, ekið framhjá þáverandi heimili a, og á meðan tekið myndband sem sýndi húsið og nýja bifreið a og b, en myndbandið sendi ákærða til a á Facebook Messenger frá falsreikningi, sem ákærða notaði til að villa á sér heimildir. Strax eftir að ákærða sendi a myndbandið sendi hún honum, frá sama reikningi, skilaboð um að hann gæti ekki falið sig, hún myndi muna bílnúmerið og að hann gæti ekki verndað b. 

A.II. 

Með því að hafa, á fyrrgreindu tímabili, endurtekið sent a skilaboð af mismunandi samfélagsmiðlareikningum sem ákærða notaði til að villa á sér heimildir, en skilaboð ákærðu fólu meðal annars í sér hótanir í garð a, s.s. því að spreyja bílinn hans, eitra fyrir hundinum hans, að hann fengi aldrei aftur frið og að hann gæti ekki falið sig, ásakanir um að nauðga og brjóta kynferðislega gegn konum, skilaboðin fólu í sér niðrandi ummæli um a og niðrandi ummæli um b, auk þess sem ákærða lét a ítrekað vita að það væri fylgst náið með honum og heimili hans. 

A.III. 

Með því að hafa, á fyrrgreindu tímabili, endurtekið sent b skilaboð af mismunandi samfélagsmiðlareikningum sem ákærða notaði til að villa á sér heimildir, en skilaboð ákærðu fólu meðal annars í sér hótanir í garð b, svo sem að hún fengi aldrei aftur frið í lífinu og að það myndi kvikna í húsinu hennar, skilaboðin fólu í sér niðrandi ummæli um b, niðrandi ummæli um a, auk þess sem ákærða lét b ítrekað vita að það væri fylgst náið með henni og heimili hennar. 

A.IV. 

Með því að hafa, á fyrrgreindu tímabili, endurtekið sent vinum og ættingjum b, skilaboð af mismunandi samfélagsmiðlareikningum sem ákærða notaði til að villa á sér heimildir, en skilaboð ákærðu fólu meðal annars í sér niðrandi ummæli um b og a. 

A.V. 

Með því að hafa, á fyrrgreindu tímabili, endurtekið sent syni a, þ.e. c, skilaboð af mismunandi samfélagsmiðlareikningum sem ákærða notaði til að villa á sér heimildir, en skilaboð ákærðu fólu meðal annars í sér niðrandi ummæli um a, auk þess sem ákærða lét c vita að það væri fylgst náið með honum og heimili hans. 

A.VI. 

Með því að hafa, á fyrrgreindu tímabili, endurtekið hringt í b og sent henni sms skilaboð úr mismunandi símanúmerum, sem og leyninúmerum, en ákærða sendi meðal annars b 27 sinnum skilaboðin  [nafn a] þann 30. september 2022. 

A.VII. 

Með því að hafa, á fyrrgreindu tímabili, farið þess á leit við þrjá einstaklinga, að a yrði beittur líkamlegu ofbeldi. 

A.VIII. 

Með því að hafa, á fyrrgreindu tímabili, stofnað Tinder reikning í nafni a, sett mynd af a á reikninginn og ítrekað látið senda Tinder staðfestingarkóða í farsíma a af reikningnum. 

A.IX. 

Með því að hafa, á fyrrgreindu tímabili, stofnað Tinder reikning í nafni b og ítrekað látið senda Tinder staðfestingarkóða í farsíma b, meðal annars á tímabilinu 12. september 2022 til 13. febrúar 2023, alls 64 kóða, en einnig á tímabilinu frá 12. september 2022 til 26. október 2022, alls 8 Facebook- og Instagram kóða.

A.X. 

Með því að hafa, á fyrrgreindu tímabili, útbúið og dreift miðum í póstlúgur og póstkassa í  [bæjarfélag], þar sem varað var við manni sem dveldi að [heimili b], sem áreitti ungar konur, hefði mikið magn barnaníðsefnis í tölvu sinni og tæki myndbönd af börnum í leik í götunni. 

A.XI. 

Með því að hafa, á fyrrgreindu tímabili, útbúið og dreift miðum í póstlúgur og póstkassa í [bæjarfélagi] , þar sem varað var við manni sem byggi að  [heimili a] , sem áreitti ungar konur, hefði mikið magn barnaníðsefnis í tölvu sinni og tæki myndbönd af börnum í leik í götunni.

A.XII. 

Með því að hafa, á fyrrgreindu tímabili, útbúið og hengt upp miða við verslun Bónus, [bæjarfélag], þar sem fram kom að a væri að auglýsa eftir börnum til að koma á heimili sitt til að passa hundinn hans á meðan hann væri að sinna kærustu sinni, en einnig kom fram að hann gæti sótt börnin. Þá var nafn og símanúmer b gefið upp á miðanum. 

A.XIII. 

Með því að hafa, á fyrrgreindu tímabili, útbúið og dreift miðum í [bæjarfélagi], þar sem fram kom á ensku að b tæki að sér að þrífa hús frítt, að hún væri einskis virði og að hún væri góð í að veita kynferðislegt nudd, en bæði nafn og símanúmer b var tilgreint á miðunum. 

A.XIV. 

Með því að hafa, á fyrrgreindu tímabili, skráð a á íslenskunámskeið hjá miðstöð símenntunnar á [bæjarfélag], án hans vitneskju og í hans óþökk.

A.XV. 

Með því að hafa, á fyrrgreindu tímabili, skráð b á námskeið hjá miðstöð símenntunnar á [bæjarfélag], án hennar vitneskju og í hennar óþökk.

A.XVI. 

Með því að hafa, þann 10. febrúar 2022, staðið að því að sírópi væri hellt yfir póstkassa og bréfalúgu á heimili b. 

A.XVII. 

Með því að hafa, þann 17. febrúar 2022, birt mynd af a á Instagram reikningi ákærðu, ásamt texta þar sem fram kom meðal annars: „[nafn a] er virkilega veikur maður.“ 

A.XVIII. 

Með því að hafa, þann 26. febrúar 2022, sent a sms, þar sem fram kom:„Aldrei aldrei aldrei tala við mig aftur ógeðið þitt!“ 

A.XIX. 

Með því að hafa, þann 1. mars 2022, sent a sms, þar sem fram kom: „Þú heyrir aldrei frá mér aftur...nema frá lögreglunni því ég slæst bara í hópinn með stelpunum sem kölluðu þig fyrir kynferðisáreitni. Ég mun vara kvenfólk við þér og vonandi deyrð einn vara og vansæll.“ 

A.XX. 

Með því að hafa, þann 26. júlí 2022, skilið eftir gulan miða á dyrabjöllu b, en á miðanum var b kölluð „tussa“. 

A.XXI. 

Með því að hafa, þann 1. október 2022, sent tölvupóst til vinnuveitanda a, í því skyni að ógna starfsöryggi hans, en í tölvupóstinum sakaði ákærða a um að hafa brotið ítrekað gegn konum, meðal annars að hafa áreitt 5 konur á síðasta vinnustað. 

A.XXII. 

Með því að hafa, í janúar 2023, sent tvær tilkynningar til vinnuveitanda b í því skyni að ógna starfsöryggi hennar, en í tilkynningunum var hún ranglega ásökuð um aðild að innflutningi og sölu fíkniefna, en tilkynningarnar sendi hún í nafni a.