Langar þig að búa þar sem kyrrðin og róin eiga heima? Í fallegri sveit í skemmtilegu samfélagi og kenna í litlum sveitaskóla? Með þessum orðum hefst auglýsing á stöðu kennara við Finnbogastaðaskóla í Nátthaganesi í Trékyllisvík.
Skólinn er í Árneshreppi á Ströndum, á norðanverðum Vestfjörðum, sem er næstminnsta sveitarfélag landsins í íbúum talið samkvæmt Hagstofu Íslands. Þar búa 60 manns, þar af þrjú börn – tíu, ellefu og tólf ára.
„Finnbogastaðaskóli er lítill og krúttlegur skóli með mikla sögu. Síðastliðinn vetur vorum við með tvö börn í skólanum og nú er að bætast í hópinn þannig þau verða alveg þrjú, 50% aukning milli ára á börnum, og okkur vantar einhvern frábæran kennara til þess að kenna þessum börnum,“ segir Sigrún Sverrisdóttir oddviti Árneshrepps.
Á vef Hagstofu Íslands er að finna skrá yfir grunnskóla á Íslandi árið 2024 og nemendafjölda en þar er enginn skóli skráður með færri en þrjá nemendur. Mennta- og barnamálaráðuneytið segir minnsta grunnskóla landsins vera Grunnskólann í Hofgarði en í honum eru sex nemendur.
Finnbogastaðaskóli er því fámennasti grunnskóli landsins. Hann hefur að vísu verið rekinn sem hluti af Grunnskólanum á Hólmavík síðan 2024. Það ár voru 38 nemendur skráðir í Grunnskólann á Hólmavík.
„Skólinn er lífæðin í samfélaginu“
Finnbogastaðaskóla var lokað 2018 og hann opnaður á ný fyrir tveimur árum. Sigrún segir skólann forsendu þess að sveitarfélagið geti laðað að nýja íbúa.
„Ég vona að ég nái í mínum störfum, ásamt góðu fólki, að laða hingað fleira fólk og að hér fjölgi börnum en ekki fækki. Ég vil hrósa fyrrverandi sveitarstjórn fyrir kjarkinn að opna skóla hérna eftir nokkurra ára hlé fyrir tvö börn af því að við sem hérna búum vitum það að skólinn er lífæðin í samfélaginu,“ segir hún.
Það sé algjörlega nauðsynlegt að hafa grunnskóla í sveitarfélaginu, annars geti ungt fólk með börn ekki sest þar að.
„Það er aukning eins og er og ég vona að það haldi svoleiðis áfram. Það væri frábært að fá kennara með börn. Það er svo sannarlega engin fyrirstaða að hafa börn með í sveitina.“
Reyna með öllum ráðum að halda skólanum gangandi
Árneshreppur er næstminnsta sveitarfélag landsins, færri búa í Tjörneshreppi. Íbúar þar eru 54, til samanburðar við 60 í Árneshreppi.
Í mars samþykktu íbúar í Árneshreppi og Kaldrananeshreppi sameiningu sveitarfélaganna en íbúafjöldi sameinaðs sveitarfélags yrði nær 150. Í dag er framtíð sameiningarinnar óljós en innviðaráðuneytið ógilti kosningu um hana í maí vegna galla á framkvæmd hennar.
Þegar sameiningin stóð til var lagt upp með að skólastarf í Árnesi og Kaldrananesi yrði sameinað og því stýrt frá bænum Drangsnesi í Kaldrananeshreppi.
„Ég á nú von á því að það yrði. Eins og við gerðum síðasta vetur þá nýttum við okkur það að við fengum skólastjórann á Hólmavík til þess að starfa sem skólastjóri og við vorum þá deild í raun og veru á Grunnskólanum á Hólmavík, vorum í samstarfi við þau í alls konar verkefnum. Ég held að það sé bara af hinu góða, að starfa sem mest saman á svona svæðum þar sem eru ekki alltof mörg börn,“ segir hún.
Síðasta vetur starfaði leiðbeinandi við Finnbogastaðaskóla en ekki kennari. Forsenda þess að vera ráðinn sem kennari er að hafa kennsluréttindi en það tíðkast að aðrir séu fengnir til að sjá um skólastarf þegar engir kennarar fást í starfið.
Fréttastofa spurði Sigrúnu hvort skólastarf yrði áfram þrátt fyrir að enginn kennari fengist í stöðuna fyrir næsta vetur.
„Við reynum náttúrlega með öllum ráðum að halda þessu starfi gangandi. Það er alveg ljóst. En það má náttúrlega ekki vera á kostnað þess að ekki sé haldið vel utan um börnin og þau fái það sem þau eiga rétt á. En við gerum allt sem í okkar valdi stendur til að geta verið hérna áfram og það er alveg grundvallaratriði að hér sé skóli,“ segir hún.
