Lögreglan kannast ekki við „tælingargengi” Sigmundar

Sigmundur Davíð Gunnlaugsson, fyrrverandi forsætisráðherraEr formaður Miðflokksins.

Mynd: Víkingur

Sigmundur Davíð Gunnlaugsson, formaður Miðflokksins og fyrrverandi forsætisráðherra, fór mikinn í pistli í gær á samfélagsmiðlum.

Var umfjöllunarefni formannsins Reykjavík en hann vill endilega að íbúar höfuðborgarinnar kjósi Miðflokkinn í komandi sveitarstjórnarkosningum sem fara fram þann 16. maí.

Í pistlinum sagði Sigmundur meðal annars að sambærilegur meirihluti hefði stjórnað Reykjavík um fjögur kjörtímabil undir mismunandi nöfnum, en að samkvæmt honum hefði „pólitískur rétttrúnaður“ Samfylkingin verið sameiginlegur þráður stjórnarinnar.

Hann hélt því fram að íslenskum íbúum borgarinnar hefði lítið fjölgað á sama tíma og erlendum íbúum hefði fjölgað verulega og að þeir væru nú um fjórðungur borgarbúa. Þá sagði hann að þróunin hefði skapað aukið álag á húsnæðismarkað, opinbera þjónustu og velferðarkerfi borgarinnar.

Sigmundur Davíð gagnrýndi einnig stöðu grunnskóla í Reykjavík og sagði þá eiga erfitt með að mæta fjölgun tungumála meðal nemenda. Hann lýsti yfir áhyggjum af námsárangri barna, agavandamálum og því sem hann taldi aukna áherslu á pólitísk málefni í skólastarfi á kostnað hefðbundins náms.

Jafnframt gagnrýndi hann fræðslu um kynferðis- og kynvitundarmál í skólum og sagði slíka umræðu hafa gengið of langt gagnvart yngri börnum.

Erlend gengi

Nefndi forsætisráðherrann fyrrverandi einnig umsvif erlendra glæpagengja og sagði svo í kjölfarið:

„Nú birtast vísbendingar um svo kölluð tælingargengi í Reykjavík. Engin borgarvöld mega láta slíkt viðgangast.”

Sigmundur fór hins vegar ekkert nánar út í hvaða vísbendingar hann ætti við.

Mannlíf sendi lögreglunni á höfuðborgarsvæðinu fyrirspurn um þessi meintu tælingargengi. Í svörum hennar segist lögregla ekki kannast við slíkt.

„Þetta hefur ekki komið inn á borð hjá okkur,” sagði Bylgja Hrönn Baldursdóttir, aðstoðaryfirlögregluþjónn hjá kynferðisbrotadeild lögreglunnar á höfuðborgarsvæðinu.