Fyrirhugað símabann í grunnskólum hefur vakið upp margar spurningar, meðal annars á meðal þeirra foreldra og barna sem nota strætókort í símum til að farðast til og frá skóla. Börnin þurfa þó ekki að örvænta vegna þess að hægt er að notast við alls kyns kort, ekki einungis smáforrit í síma, til þess að greiða fyrir strætóferðir.
Bæði lyklakippur og físísk kort í boði
Reykjavíkurborg hefur boðað símafrí sem tekur gildi í grunnskólum í haust auk þess sem mennta- og barnamálaráðuneytið hefur kynnt drög að reglugerð um notkun síma og snjalltækja í grunnskólum.
Markús Vilhjálmsson hjá Almenningssamgöngum höfuðborgarsvæðisins segir að hægt sé að nálgast áfyllanleg kort af ýmsum gerðum. Hægt er að nota áfram Klapp appið en eins er í boði að nálgast áfyllanleg klappkort sem hægt er að skrá við aðgang barna á mínar síður Klapp.
„Þau geta líka að sama skapi notað lyklakippur sem virka í raun og veru alveg eins og klippikortin sem hægt er að tengja við aðganginn, svo er alltaf hægt að fylla á þetta með stökum miðum og tímabilskortum.“
Lyklakippurnar komu á markað fyrr í ár og hafa verið vinsælar.
„Lyklakippurnar eru alltaf að verða meira og meira seldar. Þær eru hentugar fyrir þennan hóp krakka sem eru ekki endilega með veski á sér og eiga erfitt með að halda utan um kort en eru kannski með lykla á sér og þá eru þær sniðug lausn fyrir þau,“ sagði Markús.
