Donald Trump Bandaríkjaforseti gerir lítið úr áhyggjum aðstandenda hermanna sem eru um borð í bandaríska flugmóðurskipinu Abraham Lincoln í viðtali við fjölmiðla í Washington í gær. Svo virðist sem birgðavandamál fyrir skipið hafi komið upp á fyrstu dögum stríðsins í Mið-Austurlöndum.
Trump sagði hermennina ekki vera búna að vera útsenda nærri nógu lengi. Hann staðfesti þó að til stæði að skipt yrði um flugmóðurskip og herlið fljótlega. Sjóherinn hefur greint frá því að flugmóðurskipið George Washington sé á leið til að taka við af Abraham Lincoln.
Erlendir miðlar greindu frá því fyrr í vikunni að aðstandendur þeirra fimm þúsund hermanna um borð í flugmóðurskipinu Abraham Lincoln hefðu áhyggjur af andlegri heilsu þeirra og aðstæðum um borð. Til stóð að úthald þeirra yrði sex mánuðir en það hefur margoft verið framlengt.
Aðstandendur höfðu meðal annars greint frá því að sumir hermenn glímdu við sjálfsvígshugsanir og að að minnsta kosti tveir hefðu reynt að stökkva fyrir borð.
Starfandi ráðherra sjóhersins, Hung Cao, sagði í yfirlýsingu á X að fá geðheilbrigðismál hafi komið upp á skipinu og þau hefðu verið meðhöndluð. Enginn hefði dáið um borð og fjölmiðlar væru að reyna að mála bandaríska stríðsmenn sem fórnarlömb.
Vandamál hófust á fyrstu dögum stríðsins
Hermenn um borð hafa greint aðstandendum frá því að fersk matvara hafi verið af skornum skammti og máltíðir litlar. Breska ríkisútvarpið segir að nafnlaus heimildamaður og aðstandandi hermanns hafi greint frá því að hermaðurinn hafi lést um 29 kíló frá því að skipið fór á sjó.
The New York Times segir að birgðavandamál fyrir Abraham Lincoln hafi byrjað á fyrstu dögum stríðsins í Mið-Austurlöndum. Íranar gerður árásir á bandaríska sjóherstöð í Barhein og stór hluti herstöðvarinnar eyðilagðist í árásinni.
Þar með þurfti herinn að fá vistir og birgðir frá herstöð sem er undir breskum og bandarískum yfirráðum á eyjunni Diego Garicia sem er í um 2.200 mílna fjarlægð frá staðsetningu flugmóðurskipsins í Ómanflóa.
Keir Starmer, þáverandi forsætisráðherra Bretlands, neitaði Bandaríkjaher í fyrstu um afnot af herstöðinni en gaf svo eftir, fyrir „sérstakar og afmarkaðar varnaraðgerðir“. Íranar skutu tveimur meðallangdrægum flugskeytum að Diego Garcia 20. mars. Annað flugskeytið var skotið niður en hitt hafnaði í sjónum.
Engir bjórdagar í landi
Abraham Lincoln hefur nú verið á sjó í tæpa níu mánuði eins og áður segir. Á friðartímum geta hermenn farið í land í Barein eða Fujairah í Sameinuðu arabísku furstadæmunum við Ómanflóa. Það hefur þó ekki verið öruggt síðan 28. febrúar enda herstöðvar Bandaríkjanna í Mið-Austurlöndum skotmörk Írana. Hermenn um borð hafa því aldrei stigið í land eða fengið nokkurra daga frí frá borði á þessum tíma.
Samkvæmt hefð og reglum bandaríska sjóhersins getur æðsti yfirmaður um borð óskað eftir bjórdegi fyrir herliðið eftir 45 daga samfellda veru á sjó. Það hefur ekki verið gert og miðað við tíma Abraham Lincoln á sjó hefðu hermennirnir átt rétt á fimm bjórdögum á þessum tíma. Talsmaður fimmta flota sjóhersins hefur ekki svarað fyrirspurn The New York Times um bjórdaga eða hvort eftir þeim var óskað.
Hvað sem öllum bjórdögum líður þá má ætla að úthaldið hafi reynt á mannskapinn. Heima bíða svo aðstandendur um 5.000 hermanna og það er nokkuð fjölmennur hópur.
