Páll Vilhjálmsson skrifar:

Innkoma Kristrúnar forsætisráðherra í byggðakosningarnar eftir tvo daga er til þess fallin að gera kosningar á sveitastjórnarstigi að landspólitík. Ávarp Kristrúnar 1. maí geymdi bein afskipti af kosningabaráttunni í Kópavogi. Tæpum tveim vikum sér hellir forsætisráðherra sér í borgarstjórnarmálin með yfirlýsingu um að hún óttist að Orkuveita Reykjavíkur verði seld fái Sjálfstæðisflokkur ráðið.

Rök Kristrúnar eru neyðarleg í meira lagi. Í viðtengdri frétt haft eftir henni að framsal auðlinda sé ,,þvert á störf ríkisstjórnarinnar sem hafi lagt áherslu á eignarhald á auðlindum." Halló Hafnarfjörður, Kristrún er í forsæti ríkisstjórnar er stefnir leynt og ljóst að færa forræði íslenskra auðlinda til Evrópusambandsins.

Stjórnmálaforingjar á landsvísu leggja vanalega sínu fólki lið í sveitarstjórnum, tala upp framboðslista og básúna hve flokkurinn sé frambærilegur í þessu eða hinu byggðalaginu. Kristrún, hvort heldur af ásetningi eða vangá, teflir fram beinskeyttum pólitískum skilaboðum í málaflokkum þar sem hún, í embætti forsætisráðherra, er ómyndug. Hvorki leikskólamál í Kópavogi né rekstur í eigu borgarinnar eru á forræði landsstjórnarinnar. Ásýnd og yfirbragð Kristrúnar er ekki merkt gribbu - en pólitísku inngripin í lægra stjórnsýslustig eru það.

Kristrún samtengir ríkisstjórnina byggðakosningum eftir tvo daga. Pólitískt veðmál forsætisráðherra er að fái Samfylking, og eftir atvikum Viðreisn og Flokkur fólksins, góða kosningu í stærri sveitarfélögum hækki risið á ríkisstjórnarflokkunum á landsvísu. Aftur á móti. Tapist veðmálið eykst skröltið í vagni landsstjórnarinnar. Hætt er við að fleiri boltar losni, var vagninn þó ekki stífhertur fyrir. 

Ráðgjafar formanns Samfylkingar eru ekki í rónni. Össur Skarphéðinsson fyrrum formaður Samfylkingar og utanríkisráðherra skrifaði færslu á samfélagsmiðil í gær. Þar fer hann köpuryrðum um Viðreisn. Össur óttast að Viðreisn hafni samstarfi við Samfylkingu að loknum kosningum. Össuríska pólitíska greiningin er með fyrirsögninni ,,Daður Bjargar við Miðflokkinn." Oddviti Miðflokksins nýtur kvenhylli. Össur er næmur á slíka karlfugla án þess að geta að ráði sett sig í spor þeirra.

Tveir dagur eru til byggðakosninga. Úrslitin á laugardag gætu flýtt næstu þingkosningum.