Maður sogaðist næstum út um glugga á flugvél Ryanair á leið frá Grikklandi til Þýskalands í morgun þegar gluggi vélarinnar losnaði. Öðrum farþegum tókst að draga manninn aftur inn í vélina.
Í frétt AFP segir að maðurinn, ferðamaður frá Serbíu, hafi verið í flugi Ryanair frá Thessaloniki í Grikklandi til Memmingen í Þýskalandi, hafi verið fluttur á skúkrahús með núningssár, en hann sé að öðru leyti við góða heilsu.
Annar farþegi í flugvélinni lýsti því þannig fyrir Radio Thessaloniki að flestir farþegarnir hefðu verið sofandi þegar þeir hafi heyrt hljóð eins og dekk að springa.
„Við áttuðum okkur strax á því að loftþrýstingur hefð fallið. Það heyrðust öskur ... í augnablik hélt ég að einhver hefði opnað neyðarútganginn,“ segir konan.
„Súrefnisgrímurnar féllu og það var sterk lykt. Höfuð og axlir eins farþega stóðu út um gluggann. Sem betur fer hafði hann ekki losað sætisbeltið.“
Konan sagði aðra farþega hafa togað manninn aftur inn í vélina.
Samkvæmt upplýsingum frá flugfélaginu brotnaði glugginn þegar brak úr hreyfli vélarinnar lenti á honum. Flugvélin lenti í Thessaloniki án vandkvæða.
