Tímabundin virðisaukaskattslækkun á eldsneyti féll úr gildi á miðnætti. Skattprósentan hækkaði úr 11 prósentum í 24 prósent á miðnætti. Lítrinn hækkaði þar með um allt að 31 krónu þar sem hann var dýrastur fyrir.
Ríkisstjórnin ákvað að lækka skatta á eldsneyti tímabundið til að draga úr verðbólgu eftir að árásir Bandaríkjamanna og Ísraela á Íran hófust í vor.
Tímasetning þeirrar skattalækkunar miðaðist við endurskoðunarákvæði kjarasamninga í síðasta mánuði. Þá réðist hvort endurskoðunarákvæði virkjuðust eða ekki. Þar sem verðbólga var yfir 4,7 prósentum er hægt að segja upp samningum ef ekki semst um framhaldið.
Það var viðbúið að þegar virðisaukaskatturinn kom aftur á fullu að þá myndi verðið breytast. En það eru litlar breytingar á stöðunni á heimsmarkaði þannig að það veldur vonbrigðum að stjórnvöld hafi ekki allavega gripið til ráðstafana til að framlengja þessu á meðan þetta ástand varir. Það kemur auðvitað illa við fólk og í ljósi þeirra tíma sem við búum við og verðbólgunnar hefði verið æskilegt að sjá viðbrögð frá stjórnvöldum.
Þetta segir Runólfur Ólafsson, framkvæmdastjóri Félags íslenskra bifreiðaeigenda. Hann segir ekki virðast sem félögin hafi hækkað verð umfram virðisaukaskattsbreytinguna, enn sem komið er.
„En auðvitað ræðst verðið alltaf af álagningu líka og gengi íslensku krónunnar gagnvart Bandaríkjadal. Við stjórnum ekki heimsmarkaðnum,“ segir Runólfur.
En við höfum jú kvartað yfir því í gegnum tíðina að olíufélögin hafi verið með ansi drjúga álagningu. Það er nú skoðun í gangi hjá Samkeppniseftirlitinu á stöðu þessa markaðar þannig að það væntanlega veitir þeim ákveðið aðhald í augnablikinu. Svo verður bara fróðlegt að sjá hvað kemur út úr þeirri rannsókn.
