Arnór Steinn Ívarsson og Steinunn Anna Gunnlaugsdóttir hlutu Nýræktarstyrki Miðstöðvar íslenskra bókmennta (MÍB) við athöfn í Gunnarshúsi í dag.
Logi Einarsson, menningar-, nýsköpunar og háskólaráðherra afhenti styrkina, en þeir eru veittir nýjum og efnilegum höfundum. Var þetta í 19. sinn sem styrkirnir voru veittir og nam hvor styrkur fyrir sig sex hundruð þúsund krónum. Arnór Steinn hlaut styrk vegna skáldsögunnar Hreiður og Steinunn Anna vegna smásagnasafnsins Himinbjörg.
Sagan lipurlega skrifuð
Arnór Steinn er félagsfræðingur og starfar sem fræðslufulltrúi hjá Alþingi. Hann hefur áður sinnt ýmsum ritstörfum í lausamennsku fyrir tímarit og samfélagsmiðla.
Í umsögn bókmenntaráðgjafa MÍB um Hreiður segir: „Skáldsagan Hreiður eftir Arnór Stein Ívarsson er hrollvekja sem gerist í nálægri framtíð í Norðurmýri í Reykjavík. Þar finna menn hreiður á húsvegg sem er gert af óþekktum dýrum og hefur undarlega eiginleika. Stofnun, sem á að sjá um meindýravarnir, sendir starfsmenn sína á vettvang en margskonar flækjur skapast í glímunni við þetta dularfulla fyrirbæri og kemur þar við sögu flækja skrifræðis og alræðisstjórnar í landinu sem gerir hreiðrið að illviðráðanlegu vandamáli. Sagan er lipurlega skrifuð og spennandi og vekur hún margs konar spurningar um samskipti okkar og þjóðfélag“.
Textinn fullur af tilfinningum
Steinunn Anna Gunnlaugsdóttir lauk BA-námi í bókmenntafræði og íslensku árið 1988 og námi í hagnýtri fjölmiðlun 2004 ásamt kennsluréttindum. Hún gegnir nú starfi framkvæmdastjóra hugbúnaðarfyrirtækisins Locatify.
Í umsögn bókmenntaráðgjafa MÍB um Himinbjörg segir: „Í smásagnasafninu Himinbjörg er að finna sögur sex ólíkra kvenna sem allar eiga það þó sameiginlegt að leita lífshamingjunnar og þess að vera sáttar í eigin skinni – hver með sínum hætti. Sögurnar eru einfaldar á yfirborðinu en í þeim er tekist á við flóknar mannlegar tilfinningar, sorgir og sigra; átök sem eiga sér stað bæði hið ytra og innra með manneskjunni sjálfri – oftast án þess að nokkur veiti því eftirtekt. Textinn er látlaus en engu að síður fullur af tilfinningum sem lesendur kannast eflaust flestir við og skilur mikið eftir sig“.
