Donald Trump Bandaríkjaforseti tilkynnti Bandaríkjaþingi formlega á föstudag að Bandaríkin ættu í stríði við Íran að nýju. Stjórn Trumps segir að með tilkynningunni geti hún beitt her landsins í 60 daga án þess að fyrir liggi samþykki þingsins. Politico greinir frá.
Í bréfinu segir Trump að hernaðarátök hafi hafist að nýju 7. júlí, það er á þriðjudag fyrir viku.
Hann segir að hann hafi fyrirskipað hernaðaraðgerðir í samræmi við ábyrgð sína á að vernda bandarísku þjóðina, þjóðaröryggi og hagsmuni Bandaríkjanna á erlendri grund.
Trump segir átök hafa hafist að nýju eftir að Íranar brutu viljayfirlýsingu ríkjanna frá því í júní með því að ráðast á flutningskip sem sigldu um Hormússund.
Skiptust á árásum þriðju nóttina í röð
Ríkin hafa skipst á hörðum árásum í nótt, þriðju nóttina í röð.
Stjórnstöð Bandaríkjahers segir að herinn hafi hæft skotmörk víða í Íran í nótt í herferð sem stóð yfir í fimm klukkustundir.
Íranar svöruðu með því að gera árásir á bandarískar herstöðvar í Barein og Jórdaníu.
Í gærkvöld réðust Íranar á tvö olíuflutningaskip frá Sameinuðu arabísku furstadæmunum þar sem þau sigldu um Hormússund. Einn var drepinn í árásunum og átta særðust, þar af fjórir alvarlega.
