Páll Vilhjálmsson skrifar:

Framkvæmdastjóri þingflokks Samfylkingar, Þórður Snær Júlíusson, skrifar pistla til stuðnings Þorgerði Katrínu og Viðreisn vegna þjóðaratkvæðagreiðslunnar 29. ágúst. Framkvæmdastjórinn kaupir auglýsingar á samfélagsmiðlum til að dreifa boðskapnum.

Kristrún Frostadóttir formaður Samfylkingar og forsætisráðherra situr hjá í umræðunni um þjóðaratkvæði í þágu Viðreisnar. Tvær ástæður eru fyrir hjásetunni. Í fyrsta lagi að Kristrún vill ekki ganga á bak orða sinna frá kosningabaráttunni fyrir rúmu hálfu öðru ári, um að ESB-umsókn myndi kljúfa þjóðina og yrði ekki á dagskrá fengi hún nokkru ráðið. Í öðru lagi hefur forsætisráðherra enga trú á verkefninu.

Þjóðaratkvæðagreiðslan í lok ágúst hefur þegar klofið þjóðina. Verði niðurstaðan já mun sá klofningur dýpka og festast í sessi. ESB-umsókn og aðlögunarferli tröllríða pólitíkinni og samfélagsumræðunni fram að næstu þingkosningum, sem verða fyrr en seinna. Á þeim tíma yrði Kristrún forsætisráðherra í aukahlutverki í eigin ríkisstjórn. Þorgerður Katrín utanríkisráðherra fengi með já-i beint umboð frá þjóðinni fyrir Brussel-leiðangri. Umboðið yrði að sönnu veikt. Sé gert ráð fyrir um 70 prósent kjörsókn og litlum mun á fylkingum gæti já-ið sigrað með fulltingi um þriðjungs kjósenda. En umboð yrði það engu að síður. Þorgerður Katrín tæki ökumannsætið í ríkisstjórnarsamstarfinu með Kristrúnu sem farþega.

Þórður Snær þáði stöðu framkvæmdastjóra þingflokks Samfylkingar úr hendi Kristrúnar. Hann var í framboði til þingmennsku og fékk kjör en varð að segja af sér vegna undirferils og netníðs sem hann varð uppvís að undir dulnefninu þýska stálið. Fyrrum ritstjóri Kjarnans og Heimildarinnar er ekki, og hefur aldrei verið, allur þar sem hann er séður.

Skrif Þórðar Snæs ber að skoða í samhengi við innanflokksátök í Samfylkingunni. Vinstriarmur flokksins er í andstöðu við Kristrúnu og formennsku hennar. Andófshópurinn sendi frá sér yfirlýsingu í Vísi 11. júní síðast liðinn til að gera sig gildandi fyrir stóratburði sumarsins. Meðal þeirra sem skrifuðu undir eru eiginmaður fyrrum borgarstjóra er laut í gras fyrir Pétri Marteinssyni, fulltrúa Kristrúnar í slagnum um oddvitasætið í Reykjavík. Einnig er á listanum Vilhjálmur Þorsteinsson fjárfestir, náinn bandamaður Þórðar Snæs og sá er fjármagnaði útgáfuævintýri Þórðar Snæs í Kjarnanum og síðar Heimildinni.

Með skrifum sínum í þágu ESB-umsóknar Viðreisnar leggur Þórður Snær drög að því sem koma skal verði já niðurstaðan 29. ágúst. Vinstriarmur Samfylkingar mun leggja dæmið upp þannig að Kristrún geti ekki setið áfram líkt og ekkert hafi í skorist. Með hjásetu í umræðunni fyrir þjóðaratkvæðagreiðsluna er forsætisráðherra að óbreyttu ekki trúverðugur oddviti ríkisstjórnar með virka ESB-umsókn.

Ekki verður krafist afsagnar Kristrúnar, a.m.k. ekki fyrst um sinn. Bæði er að Kristrún nýtur alþýðuhylli og einnig hitt að hún sem forsætisráðherra fer með þingrofsvaldið. Ótímabærar kosningar myndu kollvarpa áætlun um hallarbyltingu. Planið er að gera Kristrúnu að valdlausu gluggaskrauti. Kristrún sitji áfram, sem formaður og forsætisráðherra, á meðan Brussel-hraðlestin brunar áfram. Breytingar verði aftur gerðar á flokksforystu Samfylkingar og ráðherraliði er endurspegli nýjan pólitískan veruleika.

Krafan verður að nýr varaformaður komi úr andófsarmi Samfylkingar. Sæti varaformanns er laust eftir afsögn Guðmundar Árna Stefánssonar Hafnarfjarðarkrata í vor. Nýr varaformaður verður kjörinn í haust.

Fyrrum borgarstjóri og núverandi þingmaður Samfylkingar, Dagur B. Eggertsson, verður fulltrúi vinstriarmsins. Í aðdraganda síðustu þingkosninga sagði Kristrún Dag aukaleikara í flokknum og að hann yrði ekki ráðherra – sem gekk eftir. Dagur mun ekki láta sér nægja varaformennskuna heldur einnig krefjast ráðherradóms og hefur til þess stuðning vinstriarmsins. Kristrún verður ekki í stöðu að neita. Dagur og Þorgerður Katrín verða í aðalhlutverkum ríkisstjórnarinnar það sem eftir lifir kjörtímabils.

Kristrún og stuðningslið hennar í Samfylkingunni standa frammi fyrir innanflokkshrollvekju eftir 29. ágúst – verði niðurstaðan já.