Þór­dís Kol­brún skipuð sendi­herra - Vísir

Fram kemur í tilkynningu frá utanríkisráðuneytinu að Þorgerður Katrín Gunnarsdóttir utanríkisráðherra hafi ákveðið að skipa Þórdísi Kolbrúnu í embætti sendiherra til fimm ára á grundvelli 2. mgr. 9. gr. laga nr. 39/1971 um utanríkisþjónustu Íslands. Skipan Þórdísar í embætti er frá 1. ágúst.Þórdís segir einnig frá þessu á Facebook. Hún kveðst munu formlega tilkynna forseta Alþingis um að hún segi af sér þingmennsku en kveðst þegar hafa upplýst þingflokk Sjálfstæðisflokksins um málið.Væntanlega mun Árni Helgason taka þingsæti Þórdísar þar sem hann er fyrsti varaþingmaður Sjálfstæðisflokksins í Suðvesturkjördæmi. Þórdís hefur setið á þingi í um áratug.„Um nokkurt skeið hef ég í málflutningi mínum lagt áherslu á að komnir séu upp tímar í alþjóðamálum sem reyna munu öðruvísi og meira á Ísland en verið hefur undanfarna áratugi, jafnvel frá því við tókum öll mál okkar í eigin hendur árið 1944,“ skrifar Þórdís í yfirlýsingu á Facebook.

Kveðst hún undanfarin misseri hafa hugleitt framtíðina og hvernig hún geti best gert gagn fyrir Ísland og íslenska hagsmuni. „Með hliðsjón af reynslu minni, þekkingu og tengslum á sviði alþjóðamála tel ég að ég geti, við núverandi aðstæður, gert mest gagn fyrir íslensku þjóðina með starfi á því sviði,“ skrifar hún.Ráðgefandi hæfninefnd mat Þórdísi Kolbrúnu mjög vel hæfa til að gegna stöðu sendiherra, samkvæmt tilkynningu ráðuneytisins. Nefndina skipuðu Einar Gunnarsson sendiherra og fastafulltrúi, Anna Jóhannsdóttir sendiherra og fastafulltrúi og Birgir Hrafn Búason mannauðsstjóri.Þórdís Kolbrún hefur átt sæti á Alþingi frá árinu 2016 fyrir Sjálfstæðisflokkinn. Hún var ferðamála-, iðnaðar- og nýsköpunarráðherra 2017-2021 og um skeið einnig dómsmálaráðherra á árinu 2019. Hún var utanríkisráðherra 2021-2023 og aftur um rúmlega átta mánaða skeið árið 2024 en í millitíðinni, 2023-2024, gegndi hún embætti fjármála- og efnahagsráðherra. Þórdís Kolbrún var einnig varaformaður Sjálfstæðisflokksins 2018-2025. Hún hefur frá því í febrúar 2025 verið sérstakur erindreki framkvæmdastjóra Evrópuráðsins um málefni barna í Úkraínu. Þórdís Kolbrún hefur ML-próf í lögfræði frá Háskólanum í Reykjavík. Hún var lögfræðingur hjá úrskurðarnefnd umhverfis- og auðlindamála 2011–2012, framkvæmdastjóri þingflokks Sjálfstæðisflokksins 2013–2014, stundakennari í stjórnskipunarrétti við Háskólann í Reykjavík 2013–2015 og 2025 og aðstoðarmaður innanríkisráðherra 2014–2016.Þórdís skrifar á Facebook að sendiherrar gegni mikilvægu hlutverki fyrir Ísland og að hún muni nálgast verkefnið af auðmýkt en um leið sjálfstrausti.„Ég er þakklát vinum mínum og félögum mínum í Sjálfstæðisflokknum fyrir farsælt samstarf á margvíslegum vettvangi undanfarin tuttugu ár. Fyrir það traust og umboð sem ég hef hlotið á þeim vettvangi þakka ég af öllu hjarta.“Fréttin hefur verið uppfærð.