Jake Reiner, annar sona bandaríska leikstjórans Rob Reiner, hefur tjáð sig opinberlega í fyrsta skipti eftir morðið á foreldrum sínum. Bróðir hans, Nick Reiner, er grunaður um að hafa myrt foreldra sína á heimili þeirra í Los Angeles í lok árs 2025.
Nick Reiner hefur verið ákærður fyrir morðið á foreldrum sínum. Reiner var handtekinn stuttu eftir morðið en hann neitar sök í málinu. Réttarhöld hefjast að nýju þann 29. apríl.
Jake Reiner segir í færslu á miðlinum Substack að hann hafi átt erfitt með að meðtaka dauða foreldra sinna, hann hafi misst helming fjölskyldu sinnar á einni nóttu.
Færslan, sem ber yfirskriftina mamma og pabbi, er tilfinningaþrungin. Í henni segir að foreldramissir sé alltaf erfiður en það að missa þau bæði í einu sé hræðilegt, „ofan á þetta allt þá er bróðir minn miðpunktur alls,“ segir Reiner í færslunni.
Glímdi við fíknivanda
Nick Reiner hafði glímt við fíknivanda um langt skeið. Kvöldið áður en hjónin fundust látin á heimili sínu sóttu þau, ásamt syni sínum Nick, jólaboð hjá spjallþáttastjórnandanum Conan O'Brien. Hegðun sonarins í umræddu teiti á hafa verið til vandræða. Feðgarnir eru sagðir hafa átt í útistöðum og rifist svo aðrir sáu til.
