Kanadískir ferðamenn hringdu á lögreglu eftir að hafa orðið vitni að skuggalegu atviki við Barnafossa. Ung bandarísk kona hafði verið skilin eftir, hágrátandi, af eldri manni sem hún sagði hikandi að væri kærasti hennar. Eftir að hún var farin aftur til hans leist ferðamönnunum ekki á blikuna og hringdu bæði á lögreglu og bandaríska sendiráðið.
Hágrátandi í vegkanti
Ferðamennirnir kanadísku voru á leið frá Barnafossum að Borgarnesi á fimmtudagskvöld þegar atvikið átti sér stað. Lýsa þau atburðarásinni í færslu á samfélagsmiðlinum Reddit.
„Hún var grátandi og að gera biðjandi handamerki svo að við stoppuðum,“ segir í færslunni. Kalt hafi verið í veðri og konan hafi augljóslega þurft á hjálp að halda. Hún hafi ekki verið með síma á sér.
„Hún sagði að kærasti sinn hefði skilið hana eftir. Hún bað um að fá að nota símann okkar til að hringja í hann,“ segir í færslunni. „Hún var að segja okkur númerið hennar þegar við komum að grænum Defender sem keyrði í átt að Barnafossum.“
Mikill aldursmunur
Það var maðurinn sem um ræddi. En hann leit út fyrir að vera mun eldri en hún. Að minnsta kosti 45 ára en sennilega mun eldri en hún á þrítugsaldri.
„Ein af stelpunum í okkar bíl spurði hvort þetta væri í raun og veru kærasti hennar og hún sagði já en með skrýtnum tón,“ segir í færslunni. „Hann stoppaði bílinn í vegkanti og hún hljóp til hans. Við heyrðum að hún grátbað hann um að hleypa sér inn. Hún greip sífellt í handföngin en bíllinn opnaðist ekki. Við stigum út úr bílnum og gengum í átt til þeirra, þá voru hurðirnar opnaðar og henni var hleypt inn.“
Eltu bílinn
Fannst hinum kanadísku ferðamönnum þetta allt hið óhugnanlegasta og grunsamlegasta og ákváðu að keyra ekki bara í burtu heldur elta græna bílinn í átt að Barnafossum. Þar stoppaði hann á bílastæði.
„Það leit út fyrir að hann væri að messa yfir henni fyrir utan bílinn,“ segir í færslunni. Tóku þau stutt myndskeið af bílnum. „Við vorum svolítið hrædd af því að þau fóru bæði inn bakdyramegin og glerið þar var dökkt. Svo skömmu seinna stígur hann út og fer í ökumannssætið og keyrir í átt frá Borgarnesi.“
Hringdu á lögreglu og sendiráð
Héldu þau áfram að elta bílinn og skömmu seinna sáu þau að hann var lagður í vegkanti með hazard ljósin á. Síðan keyrði bíllinn hratt í burtu og kanadísku ferðamennirnir sáu hann ekki meir.
Ákváðu þeir að hringja bæði á lögregluna og bandaríska sendiráðið þar sem þeim fannst þessi samskipti ekki eðlileg. Leit út fyrir að konan væri í miklum vanda.
„Við vitum ekkert hvort að maðurinn er bandarískur líka eða heimamaður eða hvað við getum gert. En hún leit út fyrir að vera mjög hrædd svo að við vildum láta fólk vita ef það sæi eitthvað skrýtið,“ segir að lokum í færslunni.
