Baridi Group í Tansaníu var stofnað af íslenska athafnamanninum Kristni Má Gunnarssyni fyrir fjórum árum. Félagið er handhafi rannsóknar- og námavinnsluleyfa á því sem Kristinn kallar batterísmálma. Þetta eru málmar á borð við kopar, liþíum, grafít, nikkel og fleiri. Kristinn er gestur Dagmála Morgunblaðsins í dag og segir þar sögu sína og útskýrir hvernig hann tengist Tansaníu. Þangað flutti hann sem ungur drengur og bjó í landinu í fjögur ár með fjölskyldu sinni. Hann var í heimavistarskóla og kynntist þar meðal annars fólki af Hehe-ættbálkinum.
Í byrjun þessa áratugar fór Kristinn til Tansaníu til að vera viðstaddur bekkjarhitting og eitt leiddi af öðru. Hann hefur verið tekinn formlega inn í ættbálkinn og verið skipaður í öldungaráð, þar sem sitja tólf manns og eru ungum höfðingja Hehe-fólksins til ráðgjafar. Kristinn er eini hvíti maðurinn í ráðinu og líkast til eini hvíti maðurinn sem er meðlimur þessa stóra ættbálks sem telur um fjórar milljónir Tansaníubúa.
Leyfi til að vinna og rannsaka dýrmæta málma
Landið er gríðarlega frjósamt og segir Kristinn að þar vaxi allt og vaxi vel. Hann nefnir sem dæmi að á meðan kornakrar í Evrópu skila uppskeru einu sinni á ári þá gefa akrar í Tansaníu uppskeru þrisvar á ári. Landið er að sama skapi mjög auðugt af málmum. Það var í framhaldi af bekkjarhittingnum að Kristinn átti fund með námavinnsluráðherra Tansaníu og fékk félag hans leyfi til bæði rannsókna og námavinnslu á ýmsum fágætum málmum. Þegar Baridi Group hitti ráðherrann sem fer með þessi mál í Tansaníu kom fram að einungis var búið að rannsaka 16% landsins á þessu sviði, það er að segja með tilliti til málma í jörðu.
Hann leggur metnað sinn í að vinna þessi náttúruauðæfi landsins eins mikið og kostur er í landinu sjálfu og skapa þar með verðmæti fyrir Tansaníu sjálfa. Hann stendur ekki einn að þessu verkefni en með honum er hópur Íslendinga sem fjárfest hefur í Baridi Group. Uppi eru hugmyndir meðal hópsins að setja upp verksmiðju á Íslandi til fullvinnslu á þessum málmum. Þar horfir hann einkum til grafíts sem fjölmörg stórfyrirtæki hafa mikinn áhuga á. Rannsóknar- og námaleyfin sem Baridi Group hefur keypt eru á einhverju besta grafítbelti sem þekkt er í heiminum og eftirspurnin er mikil.
Hugmyndir um verksmiðju á Íslandi
Engin verksmiðja er í Evrópu sem fullvinnur slíkan málm og telur Kristinn mjög eftirsóknarvert að koma slíkri verksmiðju á laggirnar á Íslandi. Aðdráttaraflið sem Ísland hefur er hrein orka en lokavinnsla grafíts og fleiri málma er mjög orkufrek. Hugmyndir um slíka verksmiðju eru sem stendur eingöngu á teikniborðinu en Kristinn og félagar hafa átt samtöl um mögulega staðsetningu og einnig hefur fjárfestahópurinn rætt við íslensk orkufyrirtæki. Slík vinnsla gæti kallað á 150 til 200 störf og möguleg velta gæti hlaupið á tugum milljarða. Vinnslan á teikniborðinu er ekki stór í sniðum segir Kristinn en gangi áformin eftir væri áhugavert að stækka enn frekar.
Hann var í raun sestur í helgan stein þegar þetta spennandi tækifæri kom upp í hendurnar á honum. „Ég hef aldrei haft þá tilfinningu, eins og í dag, að ég sé réttur maður á réttum stað að gera rétta hluti,“ segir Kristinn þegar hann horfir til þessarar stöðu sem hann og Baridi Group eru í.
Kristinn Már Gunnarsson minnir að vissu leyti á nútímaútgáfu af sögupersónunni Tarsan sem vann með innfæddum í Afríku og drýgði þar margvíslegar hetjudáðir. Kristinn segir að sér hafi ekki fyrr verið líkt við Tarsan en hefur gaman af því.
Viðtalið við Kristin er aðgengilegt í heild sinni fyrir áskrifendur Morgunblaðsins. Hægt er að nálgast það með því að smella á linkinn hér að neðan.
