Heiðar Guðjónsson, fyrrverandi forstjóri Sýnar, segir skaðabótamál fjárfesta gegn honum rógburð til að koma honum úr stjórn Íslandsbanka, þar sem hann er formaður. Hann segir fráleitt að hann fengi að sitja í stjórn bankans ef Fjármálaeftirlitið grunaði hann um nokkuð misjafnt.
Félagið Gavia Invest, sem keypti hlutabréf Heiðars í Sýn 2022, þegar hann hætti sem forstjóri félagsins, hafa stefnt honum fyrir dóm. Þeir telja hann hafa leynt upplýsingum um stöðu fyrirtækisins við söluna.
„Þetta er bara rógsherferð til að reyna að koma mér úr stjórn Íslandsbanka og það er ekkert annað á bakvið þetta,“ segir Heiðar um ásakanirnar í samtali við fréttastofu.
Hann segist ekki hafa haldið upplýsingum frá kaupendunum.
„Nei, það gerði ég svo sannarlega ekki. Og það er dálítið merkilegt að þeir eru að fjalla um viðskiptavin Sýnar sem heitir Controlant sem er mjög merkilegt nýsköpunarfyrirtæki. Það voru miklar tekjur af þeim og þeir eru að halda því fram að ég hafi einhvern veginn gefið í skyn eða haldið upplýsingum frá og villt þeirra sýn,“ segir Heiðar.
„En þeir hinir sömu sem keyptu af mér hlutabréfin þeir tvöfölduðu nánast virði Controlant í bókum Sýnar sex mánuðum eftir að ég lét af störfum þannig að þeir eru í fullkominni mótsögn við sjálfa sig.“
Ekki til rannsóknar hjá Fjármálaeftirlitinu
Greint var frá máli fjárfestanna gegn Heiðari í Morgunblaðinu í morgun. Við opnun markaða upplýsti Sýn að fyrirtækið hefði í febrúar á þessu ári upplýst Fjármálaeftirlit Seðlabankans um hugsanlega bresti í upplýsingagjöf innan fyrirtækisins um það leyti sem Heiðar seldi hlut sinn fyrir fjórum árum.
Heiðar segir Fjármálaeftirlitið aldrei hafa haft samband við hann vegna tilkynningar Sýnar í vetur. Hann hafi sjálfur upplýst eftirlitið um skaðabótamál fjárfestanna. Þetta hafi engin áhrif á störf hans sem stjórnarformaður Íslandsbanka.
„Það er dálítið magnað að það er verið að ýja að því að FME hafi mig til rannsóknar. FME metur hæfi stjórnarmanna allra banka og fjármálafyrirtækja og þetta er eitt stærsta fjármálafyrirtæki landsins. Ætti FME að leyfa mér að vera formaður stjórnar Íslandsbanka ef ég væri til rannsóknar hjá þeim? Nei, aldeilis ekki. Ég var kosinn formaður stjórnar síðast á aðalfundi í lok mars,“ segir Heiðar.
