„Maður hugsar með sér að það verði slökkt í þessu en svo réðu þeir ekkert við þetta.“
Húsið sem kviknaði fyrst í er staðsett í brekku um 200 metrum ofan við hús Arnars sem staðsett er á sléttlendi nærri á sem rennur gegnum bæinn. Eldurinn, sem fyrst logaði aðeins í einu húsi, var fljótur að breiða úr sér og berast með vindinum upp brekkuna.
„Þetta er mjög þétt byggt með sex raðhús saman. Þegar eitt fer þá hverfur lengjan.“
Hiti og þurrkar plaga svæðið
Miklir þurrkar hafa verið á svæðinu og lofthiti var þrjátíu og tvær gráður í dag þegar eldur blossaði upp. Sem betur fer fyrir Arnar leggur vindinn frá húsinu þeirra og að eldinum en hann hefur hins vegar þurft að horfa upp á hús nágranna sinna fuðra upp í dag.
„Það er dapurlegt að hugsa til þess að allt þetta fólk missi húsin sín,“ segir Arnar. „Maður fær alveg tárin í augun að horfa upp á þetta.“
Arnar segir það vera ljósan punkt að engar fregnir hafi borist af alvarlegum slysum eða dauðsföllum. Þar sem eldurinn hafi farið yfir sé þó allt brunnið með, garðar fólks, bílar og hús.
Mikið viðbragð
Kallað var til slökkvilið úr öllum nálægum bæjum, þar á meðal frá höfuðborginni Ósló sem er í tæplega 50 kílómetra fjarlægð. Þá var einnig notast við þyrlur við slökkvistörfin sem venjulega eru notaðar til að berjast við skógarelda. Fyrst voru þær tvær að sögn Arnars en það var ekki fyrr en þær voru orðnar sex sem sást að eitthvað náðist að vinna á eldinum.
Arnar, sem starfar innan byggingageirans, segist hafa heyrt af því að sent hafi verið út boð til allra sem hefðu yfir steypubíl að ráða að fylla hann af vatni og halda að svæði brunans.
Hús fjölskyldunnar umkringt viðbragðsaðilum
Þyrlurnar hafa lent á flöt við hús Arnars milli atrenna og hafa Arnar og fjölskylda aðstoðað meðal annars með því að leyfa þyrluflugmönnunum að nota hjá sér klósettið. „Þeir eru hetjur, þessir menn,“ segir Arnar. „Þeir verða hér örugglega í alla nótt.“
Tankbílar dæla svo nýjum skammti á þyrlurnar áður en haldið er aftur af stað. Einnig hafa þyrlurnar sótt vatn í Drammen-á sem rennur í gegnum bæinn en lítið er í ánni eftir mikla þurrkatíð, að sögn Arnars.
„Það er alveg skrjáfaþurrt hérna,“ segir Arnar.
Fyrir stundu var komið með stafla af pítsukössum fyrir viðbragðsaðila, segir Arnar, sem segist einnig hafa heyrt af því að börn hafi komið með ísmola til að hjálpa fólki að kæla sig en mikill hiti hefur verið á svæðinu síðustu daga, um og yfir þrjátíu stig.
Mikið hefur verið haft samband við Arnar í dag, sérstaklega eftir að farið var að segja fréttir af brunanum á Íslandi. Arnari hafa jafnvel borist skilaboð frá fólki sem hann hafi ekki heyrt frá í lengri tíma.
Nokkuð er um Íslendinga búsetta í Drammen og er meðal annars haldið árlegt þorrablót, segir Arnar. Honum er þó ekki kunnugt um neina Íslendinga sem búa þar sem eldur hefur geisað í dag.
Arnar hefur þó ekki getað slitið sig frá því að fylgjast með atburðarásinni í dag og stígur núna út fyrir húsið til að leyfa blaðamanni að heyra skarkalann og lætin. Arnar segir gnýinn í þyrlunum minna á að vera á stríðssvæði. Arnar segir ástandið nú fara batnandi.
„Nú er ekki lengur svartur reykur, bara hvítur reykur. Það er ekki komin stjórn en það er búið að minnka helling.“
Arnar hefur ekki orðið var við neina biturð í garð yfirvalda og segir fólki þvert á móti þykja vel haldið utan um fólk í því ástandi sem skapast hefur.
Í yfirlýsingu frá norsku lögreglunni nú á tíunda tímanum var því lýst yfir að eldurinn hafi tekið að róast niður. Enn hefur þó ekki verið lýst yfir að tekist hafi að ná niðurlögum hans.
Von er á góðu í nótt. Eftir úrkomuleysi síðustu tveggja vikna er spáð úrhellisrigningu í nótt sem vonandi mun vonandi gera út um að kvikni í eldinum á ný.
