Rökrétt næsta skref hjá Toyota - MBL.IS

Hinn upphaflegi bZ4X var fyrsti alrafmagnaði bíllinn sem japanski bílarisinn bauð upp á og á Touring-útgáfan ekki langt að sækja útlit og eiginleika sína.

Þykir mér líklegt að henni verði vel tekið á íslenskum markaði, en hönnuðir bílsins sögðu á kynningarfundi að dreginn hefði verið lærdómur af reynslu þeirra sem keyrðu fyrri bílinn, og sá lærdómur nýttur til þess að búa til nýjan bíl sem hentaði enn betur ökumönnum í Evrópu og í Norður-Ameríku.

Toyota bz4X Touring er glæsileg viðbót við framboð Toyota á Íslandi. Ljósmynd/Toyota

Við „íslenskar“ aðstæður

Að þessu sinni fór reynsluaksturinn fram í nágrenni hins fagra kastalabæjar Bled í Slóveníu, en þangað hafði Toyota boðið bílablaðamönnum frá ýmsum löndum til þess að prufukeyra bílinn við hinar margvíslegustu aðstæður á sveita- og fjallavegum Slóveníu.

Bíllinn fæst bæði með „alhjóladrifi“ (AWD) og framhjóladrifi, og er sá alhjóladrifni nokkuð kraftmeiri og líklega betri fyrir íslenskar aðstæður.

Skottið er rúmgott en það tekur 669 lítra með aftursætin uppi.

Það skemmdi alls ekki fyrir að á meðan reynsluakstrinum stóð var úrhellisrigning með þrumum og eldingum allan tímann.

Það beit ekki á bílinn, sem liðaðist um mjóa malarvegi líkt og áll. Fjöðrunin er góð og var því lítið ónæði fyrir ökumenn eða farþega þótt nokkrar holur væru í veginum á stöku stað.

Á hæsta tindinum byrjaði haglél sem buldi á rúðunum og jafnvel var smá hálka komin í veginn. Það skipti hins vegar litlu máli fyrir aksturinn, sem gefur mér góða von um að bíllinn muni reynast alveg jafnvel við hinar alíslensku aðstæður, sem við fengum þarna að reyna í póstkortamynd.

Ökumaður hefur allar upplýsingar á takteinum.

Í nýjustu útgáfunni sem Toyota bauð af bZ4X-bílnum voru 343 hestöfl í vélinni. Í Touring AWD-útgáfunni er búið að bæta ansi hressilega við, en vélin í honum er með 380 hestöfl. Það finnst vel þegar gefið er í.

Touring-bíllinn er sagður komast upp í 100 km/klst á 4,5 sekúndum, sem þykir ansi gott fyrir bíl af þessari stærð. Fann ég það enda sjálfur þegar ég kitlaði pinnann að bíllinn tók vel við sér, án þess þó að fórna aksturshæfni.

Eftir að haglélinu slotaði tók við bugðóttur evrópskur fjallavegur, líkt og menn sjá aðallega í bíómyndunum. Leið mér pínu þegar ég liðaðist niður veginn eins og ég væri James Bond, svona ef James Bond væri ábyrgur fjölskyldufaðir sem vildi bíl sem gæti farið út á land nokkrum sinnum á ári.

Bíllinn lætur vel að stjórn bæði á möl og malbiki. Ljósmynd/Toyota

Ein breytingin sem Toyota gerði snýr nefnilega að skottinu, en Touring-útgáfan er 14 cm lengri en hinn hefðbundni bZ4X. Sú lenging kemur aðallega með því að breyta afturhluta bílsins þannig að hann minnir meira á skutbíl og gefur þannig mun meira rými fyrir farangur.

Það sést líka á því að í bZ4X rúmaði farangursrýmið um 452 lítra, en í Touring-bílnum er það nú 669 lítrar þegar aftursætin eru uppi, eða næstum því 50% meira. Þegar sætin eru lögð niður eykst rýmið fyrir farangur svo upp í 1.718 lítra. Fjórhjóladrifni bíllinn hefur líka dráttargetu til þess að toga 1.500 kg eftirvagn og ætti það að geta nýst mörgum.

Af öðrum kostum Toyota bZ4X Touring má nefna að hann er vatnsheldur upp að 500 mm, sem ætti að duga fyrir flestar ár, en þó ekki fyrir þær dýpstu sem finnast á íslenskum fjallvegum.

Ekki væsir um farþega í aftursætinu, þar sem rúmgott er og gott fótapláss.

Farþegarýmið sjálft er svo glæsilegt eins og vera ber í bíl af þessari gerð. Þægilegt var að stilla bílstjórasætið og hliðarspeglana, og mælaborðið gefur manni ýmsar upplýsingar, bæði umbeðið og óumbeðið, allt eftir nýjustu stöðlum Evrópu.

Miðjuskjárinn er 14 tommur og GPS-kortið er því stórt og þægilegt og auðvelt að sjá helstu upplýsingar af því. Þýð kvenmannsrödd vísar manni veginn.

Ökumannssætið er þægilegt og auðvelt að stilla fyrir ökumanninn.

Í fyrstu var röddin aðeins of hávær, en auðvelt var að lækka hljóðið. Í miðjunni eru svo tvær þráðlausar hleðsluplötur fyrir farsíma, og boðið er upp á Apple CarPlay.

Innréttingin er falleg ásýndar og stýrið einkar þægilegt viðkomu. Hiti var í stýrinu, sem var ekkert verra í rigningarkuldanum sem fylgdi reynsluakstrinum. Það er mjög rúmgott fyrir farþega að sitja í bílnum, jafnt í framsæti og aftursæti. Það skiptir því litlu hvort áfangastaðurinn sé vinna og skóli á morgnana eða sumarbústaðurinn um helgar, það ætti alltaf að vera þægilegt á leiðinni.

Tvær hleðsluplötur eru fyrir farsíma.

Góð hleðslugeta

Rafhlaða bílsins er skráð á 74,7 kWst og styður hún við hraðhleðslu upp í 150 kW, en það dugar til þess að fara úr 10% hleðslu upp í 80% á um það bil 28 mínútum, jafnvel þegar kalt er í veðri.

Skráð WLTP-drægni fyrir FWD-útgáfuna er sögð allt að 560 km og fyrir alhjóladrifið er það 505 km.

GPS-kortið er einkar handhægt.

Hafa ber í huga að við íslenskar aðstæður verður drægnin oftar en ekki minni, sérstaklega á veturna þegar miðstöðin fer í gang, líkt og á við um alla rafbíla.

Toyota hefur þó búið bílinn ýmsum ráðum sem eiga að bæta nýtingu rafhlöðunnar, sérstaklega við norðlægar aðstæður, og hefur framleiðandinn heitið því að rafhlaðan muni halda að minnsta kosti 70% af upphaflegri getu sinni í allt að tíu ár, eða sem samsvarar um einni milljón kílómetra. Það er ekki lítið.

Þegar öllu er á botninn hvolft tel ég því að Toyota bZ4X Touring-bíllinn sé öflug viðbót við framboð Toyota á Íslandi, sem geti hentað mjög vel við íslenskar aðstæður.

Getur hann t.d. hentað sérstaklega fyrir þá sem hafa þegar kynnst hinum upphaflega bZ4X, en vilja meira rými, meiri dráttargetu og meiri kraft bak við stýrið.

Ljósabúnaður b4ZX Touring er af svipaðri gerð og í b4ZX.