Brynjar Níelsson, borgarfulltrúi Sjálfstæðisflokksins í Reykjavík, birtir á samfélagsmiðlum í gær þar sem hann lýsir ferð sinni til London og beinir spjótum sínum meðal annars að skipulagsmálum Reykjavíkurborgar og fyrrverandi borgarstjóra.

Í færslunni segist Brynjar vera staddur í London til að kynna sér skipulagsmál og búsetuúrræði fyrir þá verst settu í samfélaginu. Hann skrifar að honum hafi verið afhent þrjú greiðslukort frá Reykjavíkurborg vegna ferðarinnar; eitt fyrir flug og hótel, annað fyrir mat og drykk og það þriðja fyrir „ófyrirséðan kostnað“, svo sem áfengisneyslu á næturklúbbum fram undir morgun.

Brynjar segist hafa hitt borgarstjóra Lundúna í ráðhúsinu þar sem hann hafi meðal annars rætt um þéttingu byggðar. Hann kveðst hafa bent á að hægt væri að byggja húsnæði fyrir allt að milljón manns á svæðum á borð við Hyde Park og í nágrenni Buckinghamhallar. Samkvæmt frásögn hans hafi borgarstjórinn brugðist furðu lostinn við og spurt hvort hann væri í sama flokki og borgarfulltrúarnir Dóra Björt Guðjónsdóttir og Alexandra Briem. „Hann horfi á mig eitt augnablik eins og væri vangefinn,“ skrifaði borgarfulltrúinn.

Þá segir Brynjar að hann hafi einnig spurt um búsetuúrræði fyrir heimilislausa í London. Í færslunni lýsir hann því að borgaryfirvöld útvegi svefnpoka og pappakassa fyrir þá sem verst eru staddir.

Í lok færslunnar beinir Brynjar síðan orðum sínum að Degi B. Eggertssyni, fyrrverandi borgarstjóra. Hann segir að borgarstjóri Lundúna hafi spurt frétta af Degi og hvort rétt væri að hann vildi taka upp evru og ganga í Evrópusambandið. Brynjar svarar því til að Dagur hafi náð að „sérhæfa sig í upplýsingaóreiðu“, en bætir við í gamansömum tón að hann sé „ekki nógu vel gefinn til að skrifa í Moggann“.

Drekktu tvo og skrifaðu svo

Misvel er tekið í færslu Brynjars en í athugasemdakerfinu ráðleggur Helga Vala Helgadóttir, fyrrverandi þingmaður Samfylkingarinnar, Brynjari að hætta skrifa pistla eftir að hann hafi fengið sér áfengi.

„Ég hef tileinkað mér þann sið “drekktu tvo og skrifaðu svo” sem hefur verið þekktur hjá frægum samfylkingarmönnum,“ svarar Brynjar henni.

„Ég hélt að þú vildir helst minnst af þeim læra, en margur er kratinn inni við beinið...“ svarar hún til baka.

„Margt hægt að læra af krötum og almenn óregla er eitt af því,“ skrifar hann svo að lokum til Helgu.

Allt í plati

Brynjar sá sig hins vegar knúinn til að birta að færslu í dag þar sem hann segir að um skáldskap hafi verið að ræða og að ekki sé öllum gefið að greina á milli skáldskapar og sannleikans.

„Ég sendi frá mér hér á fésbókinni í gær smásögu sem Hallgrímar Helgasynir þessa lands brugðust hinir verstu við,“ skrifar hann og bætir við að hann hafi skilning á því að fólki finnist sagan hvorki fyndin né skemmtileg, en að hún hafi engu að síður verið skáldverk en ekki frásögn af raunverulegum atburðum.

Brynjar segir sérstaklega mikilvægt að leiðrétta misskilning sem skapast hafi í kjölfar skrifanna. Hann kveðst hvorki vera í ferð á vegum borgarinnar né hafa fengið greiðslukort frá Reykjavíkurborg til afnota.

„Ég er ekki í ferð á vegum borgarinnar og hef engin greiðslukort til að sukka með nema mín eigin,“ skrifar hann.

Hann segist heldur ekki hafa hitt borgarstjóra London, þrátt fyrir að það hafi komið fram í fyrri pistlinum. Hann hafi þó heimsótt Downingstræti 10 í þeirri von að rekast á Keir Starmer, en þar hafi enginn verið heima nema kötturinn.

Að sögn Brynjars er það eina sem sé satt í upphaflegu smásögunni að hann sé staddur í London. Þar sé hann í ferðalagi með hópi kvenna sem hann lýsir með sínum hætti í færslunni og segir þær meðal annars sækja í verslunarferðir í hinar þekktu stórverslanir borgarinnar, þar á meðal Harrods.