Ferðaþjónustufyrirtækið Icelandia hagnaðist um 916 milljónir króna á síðasta ári samanborið við 497 milljónir 2024. Þannig jókst hagnaður samstæðunnar um 84% á milli ára.
Rekstrartekjur námu 15 milljörðum samanborið við 12,3 milljarða árið áður og jukust þannig um 22% á milli ára.
Rekstrarhagnaður fyrir afskriftir (EBITDA) nam 2,6 milljörðum en var 1,6 milljarðar árið áður og jókst því um 55% á milli áranna 2024 og 2025.
Þetta kemur fram í tilkynningu frá Icelandia.
Í samræmi við markmið og áætlanir
Icelandia er ferðaþjónustufyrirtæki með áherslu á ferðir og upplifanir undir vörumerkjum á borð við Reykjavik Excursions, Flybus, Icelandic Mountain Guides og Dive.is. Icelandia sinnir einnig almenningssamgöngum og flutningum.
Haft er eftir Birni Ragnarssyni, forstjóra Icelandia, að hann sé ánægður með árangur ársins og þróunina milli ára.
„Síðasta ár var í samræmi við þau markmið og áætlanir sem við settum okkur. Við höfum lagt mikla áherslu á tækniframfarir og sjálfvirknivæðingu sem hefur gefið okkur betri yfirsýn og gert okkur kleift að taka skjótar og upplýstar ákvarðanir. Vöxturinn er ánægjulegur og við horfum af bjartsýni til framtíðar.”
Í nóvember 2025 var samkomulag undirritað um sameiningu Icelandia og Arctic Adventures með fyrirvara um áreiðanleikakönnun á báðum félögum og samþykki Samkeppniseftirlitsins.
„Við erum spennt fyrir þessum möguleika og trúum því að sameining okkar muni skila enn betri þjónustu fyrir ferðamenn á Íslandi," er haft eftir Birni.
