Engan sakaði þegar eldflaug frá bandaríska geimferðafyrirtækinu Blue Origin sprakk í loft upp á skotpalli á Canaveral-höfða í Flórída í Bandaríkjunum í gærkvöld.
Hin gríðarlega sprenging hristi nærliggjandi heimili og litaði himininn yfir Canaveral-höfða stuttlega appelsínugulan.
Stofnandi Blue Origin, Jeff Bezos, viðurkenndi að þetta hefði verið mjög erfiður dagur. Hann sagði að of snemmt að segja til um orsök sprengingarinnar.
„Við urðum fyrir óhappi í hitaprófuninni í dag,“ sagði fyrirtækið í stuttri yfirlýsingu sem birt var á X og bætti við að „allt starfsfólk er óhult“.
Nýjasta áfallið
Sprengingin er nýjasta áfallið fyrir geimkönnunarfyrirtækið í eigu milljarðamæringsins Jeff Bezos og New Glenn-eldflaugin er kjarninn í geimferðaáætlunum fyrirtækisins.
Elon Musk, sem stofnaði samkeppnisfyrirtækið SpaceX, vottaði samúð sína og kallaði slysið „afar óheppilegt“.
NASA og Blue Origin höfðu unnið saman að þróun tungllendingarfars fyrir Artemis-tunglferðir sínar.
Í síðasta mánuði mistókst New Glenn-eldflaug Blue Origin að koma fjarskiptagervihnetti á rétta sporbaug, sem leiddi til rannsóknar.
Þrátt fyrir að fyrirtækinu hafi tekist að endurnýta og endurheimta burðarflaug fyrir New Glenn-eldflaugina, tókst ómannaðri ferðinni ekki að koma gervihnettinum frá fyrirtækinu AST SpaceMobile á áfangastað.
