Útivistarsvæðið við Hvaleyrarvatn í Hafnarfirði er mikið notað allt árið um kring. Þar sést ekki í hús, að undanskildu húsnæði sem er notað undir skátastarf, og allt er umlukið háum trjám sem Skógræktarfélag Hafnarfjarðar hefur gróðursett.
Í tillögu að nýju aðalskipulagi Hafnarfjarðar er gert ráð fyrir íbúabyggð við vatnið. Á þriðja þúsund manns hafa skrifað nöfn sín á undirskriftarlista þar sem fyrirhugaðri byggð við Hvaleyrarvatn er mótmælt.
Sveit í borg
„Þetta er svo nálægt bænum, samt erum við komin svo mikið út í sveit. Svo er þetta bara auðvitað einstök perla, vatnið, þetta einstaka starf sem Skógræktarfélag Hafnarfjarðar hefur unnið í stígalagningu og skógrækt, svo eru skátarnir með aðstöðu hérna. Þannig að þetta er svæði sem ofboðslega margir nýta. Það er svo mikil kyrrð og ró svona nálægt bænum,“ segir Stefán Georgsson, íbúi í Hafnarfirði.
2.567 hafa skrifað undir
Í tillögu að nýju Aðalskipulagi Hafnarfjarðar 2025-2040 er gert ráð fyrir íbúabyggð í og við Vatnshlíð, svæði merkt ÍB12. Hluti af Vatnshlíðinni snýr að Hvaleyrarvatni og þegar þessi frétt var skrifuð höfðu 2.567 manns skrifað nafn sitt á undirskriftarlista með yfirskriftinni: Hvaleyrarvatn - ekki byggja í Vatnshlíð. Þar er þessum áætlunum mótmælt af ótta við að byggingarnar spilli heildarásýnd. Stefán segir allt að fimm hæða hús geta risið í hlíðinni við vatnið.
„Í dag er þetta ósnortið svæði, næstum því við bæjarmörkin, við þurfum bara að keyra í fimm mínútur eða hjóla frá bænum til að vera komin út í ósnortna náttúru. Ef það verður byggt hérna megin í hlíðinni þá mun það breyta heildarupplifuninni svo mikið.“
Vilja ekki blokkarbyggðir
Fréttamaður ræddi við fólk á rölti við vatnið.
„Mig langar ekki að fá þessa byggð, við erum akkúrat að horfa bara á náttúru hérna í kringum okkur og það væri ekkert rosalega heillandi að vera hérna með blokkirnar yfir sér. Þú veist maður vill koma hingað til þess að vera í náttúrunni,“ sagði Annetta Franklín Karlsdóttir, íbúi í Hafnarfirði.
„Miðað við teikningarnar, þá finnst mér byggðin ná fulllangt en ef það á að vera einhver byggð þá gæti ég alveg séð fyrir mér svona lágstemmda byggð, bara svona einfaldar sumarbústaðabyggðir en ekki einhverjar blokkarbyggðir,“ sagði Sigurður Ingi R. Guðmundsson, starfsmaður í Hafnarfirði.
Ein af skyldum sveitarfélaga að útvega lóðir
Orri Björnsson, formaður bæjarráðs í Hafnarfirði, segist sjá fyrir sér að í Vatnshlíðinni við Hvaleyrarvatn verði fyrst og fremst sérbýli og minni fjölbýlishús.
En hvers vegna er byggðin hugsuð þarna megin Vatnshlíðarinnar, þannig að hún sést frá Hvaleyrarvatni?
„Sko, ég er nú ekki alveg viss um að hún sjáist mikið frá Hvaleyrarvatni, það mögulega sést eitthvað en það verður ekki mikið. Ég held að við hljótum að þurfa að nýta það land sem við eigum innan vaxtarmarkanna. Við þurfum að byggja áfram, það er áfram eftirspurn eftir húsnæði og það er nú ein af skyldum sveitarfélaga að útvega lóðir fyrir húsnæði þegar við þurfum á því að halda.“
