Steingrímur Rúnar Guðmundsson, verslunarstjóri Pennans Eymundssonar, greindi frá heimsókn Cleeves á Facebook við góðar undirtektir aðdáenda glæpasagnahöfundarins en 21 bóka hennar hefur verið þýdd yfir á íslensku.
„Ekki á hverjum degi sem maður hittir einn þekktasta glæpasagnahöfund Bretlands sem einfaldlega gengur inn í bókabúð á Ísafirði og heilsar upp á bóksalana,“ skrifaði Steingrímur í færslunni.
Cleeves hefur skrifað fjörutíu skáldsögur sem hafa flestar hverjar orðið metsölubækur í Bretlandi og víðar, þar með talið á Íslandi. Hún er einna þekktust fyrir seríu sína um rannsóknarlögreglumanninn Veru Stanhope sem var aðlöguð að sjónvarpi með fjórtán þáttaraða seríunni Veru (2011-25) á BBC og Hjaltlandseyjaseríuna um Jimmy Perez sem varð síðar að BBC-þáttunum Shetland (2013-).
„Hún kom hérna við og fyrir okkur hefði þetta getað verið hver sem er, maður kveikti ekkert á því hver hún væri. Hún kynnti sig voða hógvær: „Sæl, ég heiti Ann og skrifaði þessa á bók“ og hélt á bók sem hún tók úr hillunni hjá okkur,“ sagði Steingrímur um Cleeves í samtali við blaðamann.
„Hún bauðst síðan til að árita nokkrar bækur og fór. En svo kom hún aftur og vildi láta taka mynd af sér við Eymundsson-skiltið,“ sagði hann.
„Hún er mjög stór á breskan mælikvarða, miklu stærri en maður hélt. Maður er búinn að vera með þetta nafn fyrir framan augun í mörg ár hérna í búðinni. Ekta breskur spennusagnahöfundur og miðað við viðbrögðin við Facebook-statusnum eru ansi margir sem eiga hana sem uppáhalds höfund,“ sagði hann.
En hvað kom til að hún var á Íslandi?
„Hún sagðist vera um borð í skipi sem er hérna við höfn í dag. Hún virðist vera um borð til að halda fyrirlestra og sagði að það væri mjög hentugt fyrir sig að ferðast og halda fyrirlestra,“ sagði Steingrímur um Cleeves.
