Margir að missa sig á síðustu metrunum - MBL.IS

Laxveiðimenn eru nú víða á útkíkki eftir þeim silfraða. Lax hefur sést í þó nokkrum ám enda tímabilið að bresta á. Laxar hafa sést í Laxá í Leirársveit, Laxá í Kjós, tveir sáust í Miðfjarðará á hefðbundnum vorstað í dag, í Kistunum í Vesturá. Norðurá er svo sannarlega búin að taka á móti þeim fyrstu og ríflega það. Laxar hafa sést á Brotinu, Berghylsbrotinu, Stokkhylsbroti og víðar. Í gær sáu vanir menn þrettán laxa á Brotinu en þeim hafði fækkað verulega þegar sami staður var skyggður í dag. Sömu sögu má segja af Berghylsbrotinu en laxar sem sáust þar í gær voru horfnir í morgun.

Sumarblíða var í Norðurárdalnum í dag og lofthiti fór í sautján gráður. Við þau skilyrði stígur vatnshiti að sama skapi og með vatnshita í kringum átta gráður þá skapast kjörskilyrði fyrir laxinn til að ganga. Norðurá er í rúmum tólf rúmmetrum og við þær aðstæður er gaman að veiða hana. Vissulega detta út veiðistaðir en aðrir koma sterkir inn.

Landeigendur og leigutakar skáluðu í kampavíni í fyrra þegar Urriðafoss opnaði og laxveiðitímabilið hófst. Ljósmynd/Sporðaköst

Brynjar Þór Hreggviðsson sem er einn af rekstraraðilum Norðurár skaust upp í Borgarfjörð til að skoða aðstæður. „Já. Það eru margir að missa sig á síðustu metrunum. Við opnum á fimmtudag og við höfum séð drjúgt af laxi. Laxarnir sem ég sá í dag voru þykkir og virtust flottir. Betur haldnir en í fyrra. Þannig að maður er orðinn virkilega spenntur,“ sagði Brynjar Þór í samtali við Sporðaköst í kvöld.

Laxveiðitímabilið hefst formlega í fyrramálið þegar landeigendur og leigutakar byrja í Urriðafossi. Sporðaköst verða þar og munu flytja fréttir af gangi mála.

Seinustu hundraðkallar sumarsins