Lögregla hefur lokið umfangsmikilli rannsókn á hópárás sem varð í bílakjallara undir Höfðatorgi í mars. Málið er komið á borð héraðssaksóknara sem tekur ákvörðun um ákæru.
Þrír urðu fyrir árásinni og átta voru handteknir í tengslum við málið í mars. Lögregla telur að bíl hafi verið ekið á einn þeirra og var árásin rannsökuð sem tilraun til manndráps. Tveir eru enn í gæsluvarðhaldi.
Heimildir fréttastofu herma að annar þeirra sé ökumaður bílsins, Land Rover Defender-jeppa, sem ekið var á manninn. Átökin eru sögð hafa snúist um peningaskuld sem þeir sem urðu fyrir árásinni ætluðu sér að innheimta.
Maðurinn sem varð fyrir bílnum slasaðist alvarlega og var um tíma á gjörgæslu. Samkvæmt heimildum fréttastofu var hann með fleiri áverka, eftir eggvopn og barsmíðar.
Mennirnir tveir sem sæta gæsluvarðhaldi eru erlendir ríkisborgarar, annar frá Palestínu og hinn fæddur í Svíþjóð með ættir að rekja til Sómalíu.
Ævar Pálmi Pálmason aðstoðaryfirlögregluþjónn hjá miðlægri rannsóknardeild lögreglunnar, sagði við fréttastofu í mars að ekkert benti til þess að mennirnir hefðu tengsl við Hamas eða hryðjuverkasamtök eins og Morgunblaðið fullyrti í kjölfar árásarinnar.
