Lykilstjórnendur Flugfélagsins Atlanta ehf. (Air Atlanta), undir forystu forstjórans Baldvins M. Hermannssonar, hafa keypt meirihluta félagsins. Jafnframt hefur bandaríska félagið Atlas Air Worldwide (Atlas) bæst í eigendahópinn.
Kaupverð er trúnaðarmál.
Engar breytingar verða á daglegum rekstri félagsins, staðsetningu eða starfsmannahaldi og mun núverandi stjórnendateymi áfram stýra uppbyggingu fyrirtækisins með sama hætti og áður.
Air Atlanta er alþjóðlegt leiguflugfélag sem sérhæfir sig í rekstri breiðþotna og var stofnað árið 1986. Félagið rekur í dag 19 Boeing 747 og Boeing 777 flugvélar.
Eignast fjárfestingarfélög
Eftir viðskiptin eiga lykilstjórnendurnir 51% hlut en Atlas 49%. Samhliða eignast Atlas allt hlutafé í Arctic Aircraft Leasing ehf. og Northern Lights Leasing ehf., sem eru fjárfestingafélög innan samstæðunnar og fara með eignarhald flugvéla félagsins. Seljendur eru Hannes Hilmarsson, Geir Valur Ágústsson, Stefán Eyjólfsson og Helgi Hilmarsson, sem eignuðust Air Atlanta og tengd félög árið 2007.
Spurður um tímasetningu sölunnar segir Baldvin í samtali við Morgunblaðið að hún sé góð fyrir margra hluta sakir. Fyrri eigendur hafi eytt tuttugu árum í uppbygginu félagsins og telji rétt að stíga nú frá borði eftir frábært starf.
„Ég hef átt einstakt samstarf með þeim síðastliðin tuttugu og fimm ár við framþróun félagsins, en ég byrjaði hjá félaginu þann örlagaríka dag í flugsögunni 11. september árið 2001 þegar árásin á tvíburaturnana í New York átti sér stað. Ég bjóst ekki við að verða svona langlífur í starfi en ég tók við sem forstjóri árið 2019. Það má segja að hér séu að verða bæði kaflaskil og kynslóðaskipti,“ segir Baldvin.
Kaupendur meirihlutans eru níu en auk Baldvins, sem fer með stærsta hlutinn, eru eigendur þau Unndór Jónsson, Bergur Guðjóns Jónasson, Magnús Sigurðsson, Egill Þorvarðarson, Ólafur Örn Jónsson, Ketill Árni Ketilsson, Þórmundur Sigurbjarnason og Berglind Ósk Gunnarsdóttir.
Aldrei staðið betur
Baldvin segir að félagið hafi aldrei staðið betur. „Við erum nú þegar á góðri leið með að ná okkar helstu markmiðum fyrir árið 2026,“ segir hann og bætir við að ný Boeing 777 fraktvél sé að koma inn í flotann í júní. „Nýliðunin heldur áfram og við horfum björtum augum til framtíðar.“
Forstjórinn er afar ánægður með nýja erlenda samstarfsaðilann og meðeigandann. „Það að fara í samstarf með jafn stórum, þekktum og öflugum fjárfesti og Atlas er gerir ekkert annað en að auka slagkraft okkar á alþjóðavísu. Þetta er eins og að fara úr fyrstu deild og upp í úrvalsdeild.“
Um tækifærin sem felast í samstarfi við Atlas segir Baldvin að samlegðin sé mikil, enda sé viðskiptamódel félaganna að mörgu leiti svipað. Bæði leigja þau og þjónusta alþjóðlega flutningsaðila en á ólíkum markaðssvæðum.
„Samtals munu félögin reka 79 Boeing 747 breiðþotur og nítján 777 fraktvélar. Það er eftir umtalsverðu hagræði að slægjast fyrir okkur ef horft er til aðgengis að nýjum vélum, samvinnu í loftferðaréttindum, kaupum á varahlutum og viðhaldi um allan heim. Báðir geta lært af hinum. Atlas er fjárhagslega sterkt félag og vel flugvélum búið. Við ætlum okkur að byggja upp stórt alþjóðlegt leiðarkerfi og halda áfram að stækka félagið og styrkja.“
Kaupin eru háð leyfum eftirlitsaðila. „Við gerum ráð fyrir að þeirri vinnu verði lokið í ágúst – september enda er ekkert til fyrirstöðu að okkar mati. Fjármögnun, sem er erlend, er að fullu lokið.“
Baldvin vill að lokum ítreka þakklæti til fráfarandi eigenda sem hann óskar alls hins besta í næstu verkefnum. „Þeir geta gengið mjög stoltir frá borði enda hafa þeir skilað af sér afar öflugu félagi bæði í íslenskum og alþjóðlegum samanburði.“
Fyrstu ár krefjandi
Hannes Hilmarsson fráfarandi formaður stjórnar Atlanta segir í tilkynningu að félagið standi í dag sterkara en nokkru sinni fyrr og fráfarandi eigendur séu afar þakklátir fyrir þau tæpu tuttugu ár sem þeir hafa átt samleið með félaginu.
„Fyrstu árin voru krefjandi, en með samheldni og ótrúlegri vinnusemi starfsfólks tókst að byggja upp sterkt, leiðandi alþjóðlegt flugfélag sem á djúpar rætur í íslenskri flugsögu. Við kveðjum með stolti, fullvissir um að nýir eigendur muni halda áfram að byggja á þeim trausta grunni sem lagður hefur verið,“ segir Hannes.
Michael Steen forstjóri Atlas Air segir í tilkynningunni að viðskiptin endurspegli nálgun Atlas á markaði sem einkennist af takmörkuðu framboði á breiðþotum í frakt- og farþegaflugi.
„Með fjárfestingunni styrkjum við stöðu Atlas í Evrópu með reynslu og rekstrarmódeli Air Atlanta. Samstarfið mun auka aðgengi að flugvélum og styrkja enn frekar getu okkar til að skapa verðmæti fyrir viðskiptavini, starfsfólk og hagaðila um allan heim. Air Atlanta hefur byggt upp sterkt orðspor í gegnum árin og við hlökkum til samstarfs við framúrskarandi teymi félagsins. Við teljum að þetta samstarf muni styrkja bæði félög og skapa sterka stöðu til áframhaldandi árangurs á alþjóðlegum flugmarkaði,“ segir Steen.
Leiðandi á heimsvísu
Atlas Air Worldwide er leiðandi fyrirtæki á heimsvísu í útvistuðum frakt- og farþegaflutningum. Félagið er móðurfélag Atlas Air, Inc., Titan Aviation Holdings, Inc. og Polar Air Cargo Worldwide, Inc.
„Með um 5.000 starfsmenn, þjónusta félögin fjölbreyttan hóp viðskiptavina um heim allan með starfsemi á meira en 300 áfangastöðum í 90 löndum. Saman reka félögin stærsta flota heims af Boeing 747 fraktvélum og umfangsmikinn flota Boeing 747, 777 og 767, auk Airbus A350F fraktvéla sem bætast við flotann árið 2029,“ segir að lokum um nýjan meðeiganda Air Atlanta í tilkynningunni.
