Donald Trump Bandaríkjaforseti heitir því að veita Líbönum aðstoð. Þetta kom fram á fundi hans með Joseph Aoun forseta Líbanons í Hvíta húsinu í dag. Trump tilkynnti þó ekki um neinar áætlanir eða stefnu til að fylgja fyrirheitunum eftir.
Ætlar að sjá til þess að komið verði fram við Líbanon af virðingu
Bandaríkin höfðu milligöngu um samkomulag milli ísraelskra og líbanskra stjórnvalda um skilyrði fyrir brottför Ísraelshers frá suðurhluta Líbanons og afvopnun Hezbollah.
Líbanon dróst inn í átök Bandaríkjanna og Ísraels við Íran í byrjun mars þegar Hezbollah-samtökin skutu eldflaugum að Ísrael til að hefna fyrir loftárásir á Íran þar sem Ali Khamenei æðstiklerkur var drepinn. Ísraelsher gerði loftárásir víða í Líbanon og hóf landhernað í suðurhluta landsins.
Aoun þakkaði Trump og starfsfólki hans fyrir að skipuleggja heimsóknina og fyrir samkomulagið við Ísrael.
„Það er tímabært fyrir Líbanon og allan heimshlutann að ná stöðugleika og öryggi. Ég veit að þú sérð fyrir þér frið og stöðugleika og ég held að mín sýn samræmist þinni. Saman getum við náð og tryggt árangur í þeim efnum.“
Vel fór á með forsetunum tveimur og Trump tók undir orð Aoun þegar þeir svöruðu spurningum fjölmiðla. „Þið hafið mikinn baráttuanda með ykkur. Þið eigið fólk sem elskar landið og ætlar að láta þetta ganga upp.“
Trump sagði að illa hefði verið farið með Líbanon undanfarna áratugi. „Við ætlum að sjá til þess að það verði komið vel fram við það og að það verði meðhöndlað með þeirri virðingu sem það á skilið.“
Myndi ræða við Hezbollah
Hann var spurður út í hvenær Ísraelsher ætlaði að draga sig frá Líbanon. „Þeir eru að gera það, þeir eru að færa sig yfir á aðra hluta. Þetta var frábært samkomulag sem þeir undirrituðu við Líbanon og þeir eru að færa sig.“
Utanríkisráðuneyti Bandaríkjanna tilkynnti í gær um fyrsta tilraunasvæðið svokallaða í Líbanon, sem kveðið er á um í samkomulagi ríkjanna tveggja. Líbanski herinn á að fara inn á slík svæði, bæi sem voru áður hernumdir af Ísraelsher, og tryggja að þar sé engin viðvera Hezbollah-samtakanna, svo íbúar geti snúið aftur og endurreisn hafist.
Bæirnir þrír sem voru undir í fyrsta tilraunasvæðinu voru reyndar ekki undir stjórn Ísraels svo herinn dró sig ekki þaðan. Ísraelsher staðfesti í gærkvöldi að hann myndi aðlaga staðsetningu sína á einu af þessum tilraunasvæðum til að gera líbanska hernum kleift að koma inn og sinna sínu verkefni.
Aðspurður hvort Trump myndi ræða við Hezbollah til að koma á friði svaraði hann: „Ég myndi tala við Hezbollah. Ég myndi tala við alla. Ég myndi tala við fólk sem margir telja að ég ætti ekki að tala við. Og hlutirnir ganga upp. Ef forsetinn vildi að ég talaði við Hezbollah, þá myndi ég gera það.“
