Maður sem taldi sig vera að leigja íbúð á Alicante á Spáni í gegnum fyrirtækið Sólarmegin en var svikinn hefur haft samband við lögregluna á höfuðborgarsvæðinu til að kæra málið. Umræddur maður, sem ekki vill koma fram undir nafni, greiddi 400 þúsund krónur fyrir íbúðina nú í ágúst.
Fréttastofa greindi frá því fyrr í dag að minnsta kosti tíu Íslendingar hefðu lent í vandræðum eftir að hafa leigt íbúðir á Alicante af þessu fyrirtæki og greitt því háar fjárhæðir. Fólkið hefur svo ekki fengið aðgang að íbúðunum. Ástæðan er sú að móðurfélag Sólarmegin er komið í greiðslustöðvun.
Fyrirtækið tengist íbúðinni ekki neitt
Maðurinn segir í samtali við fréttastofu að hann telji augljóst að markmið fyrirtækisins hafi alltaf verið að stela þessum peningum af sér.
Ástæðan er sú að eftir að hann millifærði 400 þúsund krónur á fyrirtækið fyrir íbúðinni nú í ágúst grennslaðist hann fyrir um íbúðina sem hann taldi sig vera að fara að dvelja í nú síðar í september. Hann ætlaði að búa í íbúðinni í tvo mánuði. Í ljós kom að fyrirtækið Sólarmegin tengist íbúðinni sem hann hafði greitt nærri hálfa milljón fyrir ekki neitt.
Maðurinn komst að því að íbúðin sem hann hafði leigt var í útleigu hjá öðru fyrirtæki sem heitir Homes in the Sun. Í tölvupósti frá fyrirtækinu kom fram að búið væri að leigja einhverjum öðrum íbúðina á þeim tíma sem hann hafði greitt fyrir.
Í tölvupósti frá fyrirtækinu til mannsins sagði að íbúðin væri ekki leigð út í gegnum fyrirtækið Sólarmegin. Þar sagði orðrétt: „Okkur þykir þetta leitt. Reyndu endilega að fá peningana þína til baka frá þeim. Þessi íbúð tengist þessu fyrirtæki ekkert. Í framtíðinni getur þú leigt íbúðina í gegnum okkur ef þú vilt.“
Maðurinn segist hafa rökstuddan grun um að fleiri viðskiptavinir fyrirtækisins Sólarmegin hafi verið blekktir með sams konar hætti.
Útskýrði stöðuna fyrir manninum
Eins og sagt var frá fyrr í dag þá hefur eigandi Sólarmegin, Samúel Jón Samúelsson, haft samband við viðskiptavini félagsins og útskýrt fyrir þeim að fyrirtækið sé komið í greiðslustöðvun og geti ekki staðið við skuldbindingar sínar.
Samúel hafði einnig samband við manninn sem hér er til viðtals nú í september og útskýrði stöðu fyrirtækisins fyrir honum. Þar sagði: „Staðan er sú að Sólarmegin er komið í hendur nýrra aðila og eru þeir að byrja með nýjar áherslur með merki sem ég átti. [...] Sammlind ehf. sem hefur átt og rekið Sólarmegin frá árinu 2019 er komið í greiðslustöðvun og því allt komið í fár. Það leikur sér enginn að því að lenda í þessari stöðu eða enda svona. Ég hef fram á síðustu stund reynt allt til að bjarga öllum og öllu. En eftir langa fundi með lögfræðingi okkar á Íslandi og á Spáni þá er mér ráðlagt að gera ekki neitt því þetta þarf að fara lögleiðina og ég er svosem ekki sá fyrsti né sá síðasti sem lendir á þessum stað. Auðvitað er fólk reitt og ég skil það mjög vel og það hafa allir sína leið til að sækja til lögfræðings ef það vill og það skil ég líka mjög vel.“
Athygli vekur að Samúel segir svo við manninn að til hafi staðið að greiða inn á leiguna fyrir íbúðinni sem maðurinn var búinn að greiða fyrirtækinu fyrir núna í vikunni.
Orðrétt segir Samúel um þetta: „Hvað þína eign varðar þá átti að greiða inn á eignina núna í vikunni sem þú að koma en þá var allt komið í stopp og hef ég verið að reyna að leysa málið við eigandann en án árangurs. Ég er án fyrirtækis núna og reyni að hjálpa hvað ég get og að fá endurgreitt það sem viðskiptavinir hafa greitt.“
Þegar maðurinn fékk þennan póst segist hann hafa verið búið að fá það staðfest að Sólarmegin hafði íbúðina, sem hann hafði borgað 400 þúsund krónur fyrir, aldrei til leigu og tengist henni raunar ekki neitt.
Samúel Jón Samúelsson staðfesti í viðtali við fréttastofu fyrr í dag að fyrirtæki hans væri komið í greiðslustöðvun og að hann myndi reyna að endurgreiða viðskiptavinum þess leiguna fyrir íbúðunum á Spáni. Hann vísaði að öðru leyti á lögmann fyrirtækisins.
