Í óefni stefndi þegar Juan Gabriel Reys, 51 árs gamall farþegi með flugi Frontier-flugfélagsins bandaríska frá San Juan í Puerto Rico til Chicago í Bandaríkjunum á sunnudaginn, ákvað að hann vildi koma sér frá borði.
Þetta gerðist hins vegar 45 mínútum eftir að vélin, flug 3345, fór í loftið frá San Juan. Lýsti Reys því þá yfir að hann vildi út og gerði, samkvæmt upplýsingum frá embætti lögreglustjóra í Miami-Dade-sýslu í Flórída, tilraun til að opna neyðarútgang og brjótast inn í flugstjórnarklefa, vélin þá komin í farflugshæð.
Brást Reys, sem nú hefur verið kærður fyrir afskipti af störfum flugáhafnar og árás innan bandarískrar lögsögu, ókvæða við þegar honum var sagt að ótækt væri að farþegar yfirgæfu vélina á flugi og gerði tilraun til að brjóta upp hurð flugstjórnarklefans með því að skella öxl sinni í hana af krafti.
Reyndi að losa þvag sitt á gólfið
Í kærunni kemur enn fremur fram að kærði hafi beðið um leyfi til að fara á salernið þegar afskipti voru höfð af honum en reyndi þar að losa þvag sitt á gólfið áður en áhafnarstarfsfólk handsamaði hann og kom honum fyrir sæti, sem ekki var það sem honum var úthlutað, og bauðst starfsmaður úr áhöfninni til að sitja hjá honum.
Þegar sá þurfti á salerni réðst Reys á hann, hafði hann undir og tók hann hálstaki.
Aðrir í áhöfn bundu farþegann óstýriláta þá niður í sæti en hann braust úr böndum samkvæmt skýrslu lögreglu.
Þar með reis Josh Longood úr sæti sínu í vélinni, þjálfari í bardagalistinni jiu-jitsu, hinu brasilíska afbrigði hennar, og leiddist þófið með Reys. Tók Longood Reys traustataki, skellti honum í sæti og batt hann þar eins og rúllubagga svo hann mátti sig hvergi hræra.
„Hverjir eru möguleikarnir?“ spurði þjálfarinn í samtali við bandarísku útvarpsstöðina WLS, „Þess vegna þjálfa ég. Þess vegna stunda ég jiu-jitsu, svo ég geti haldið sjó í raunverulegum aðstæðum á borð við þessar.“
Auðna hafi ráðið
Segir hann heppni hafa ráðið því að hann sat þar sem hann sat, hann hafi vitað að hann gæti haft hemil á aðstæðum án þess að aðrir biðu tjón.
Flugmenn fengu heimild til neyðarlendingar í Miami þar sem lögregla handtók Reys og færði hann alríkislögreglunni FBI í hendur í kjölfarið þar sem hann var yfirheyrður og er nú gert að mæta fyrir dóm og svara til saka.
Á þessu ári einu hefur bandaríska flugumferðastofnunin FAA fengið 687 tilkynningar um hegðun svokallaðra flugdólga inn á sitt borð á fimm mánuðum.
