Litli frændi fíkniefnisins Spice og hunang sem inniheldur stinningarlyf og heitir aukinni karlmennsku er til sölu á opnum íslenskum vefsíðum. Allur gangur er á hvort innihaldsefnin séu gefin upp.
Í einni vefverslun er fólki boðið að upplifa hið sanna leyndarmál karlmennsku. Það má gera með því að neyta taílensks hunangs, sem sagt er þekkt fyrir að auka orku og úthald.
Adam Erik Bauer réttarefnafræðingur hjá rannsóknarstofu í lyfja- og eiturefnafræði greindi innihaldsefni hunangsins að beiðni fréttastofu.
Stinningarlyf fundust við efnagreiningu
„Við erum að sjá, við efnagreiningu, að það inniheldur vissulega hunang,“ segir Adam. „En það eru líka tvö lyf - Tadalafil og Sildenafil, sem við greinum í því.“
Þessi tvö lyf eru stinningarlyf, en Sildenafil er virka efnið í Viagra.
Þannig að þetta hunang virkar eins og stinningarlyf? „Já. Þegar þetta er tekið inn myndi það hafa þannig virkni,“ segir Adam.
Þessa er ekki getið í innihaldslýsingu hunangsins þar sem segir að það innihaldi vítamín og ýmsar jurtir.
Hefur ekki haft slíkt áður til rannsóknar
Í reglugerð um lyfsölu segir að lyf megi einungis selja eða afhenda í lyfjabúðum, lyfjaútibúum eða hjá öðrum þeim er heimild hafa til sölu eða afhendingar lyfja samkvæmt lyfjalögum.
Spurður hvort hann hafi fengið eitthvað svipað til rannsóknar áður segir Adam svo ekki vera. „Þetta er í fyrsta skiptið sem við sjáum þetta.“
Geðvirkt kannabisefni í boði
Ýmislegt annað má fá í íslenskum vefverslunum og úrvalið er fjölbreytt. Til dæmis fæst þar efni sem heitir Nepal hash og er samkvæmt sölutexta kannabínóíði af nýrri kynslóð og er sagt hafa geðvirk áhrif. Kannabínóíðar eru virku efnin í kannabisplöntunni.
Litli frændi Spice
Annar kannabínóíði af nýrri kynslóð er fíkniefnið Spice sem hefur náð mikilli útbreiðslu síðustu ár, en það er tilbúið efni frá grunni, sem líkir eftir vímuáhrifum kannabisplöntunnar. Adam greindi innihaldsefnin í Nepal hash að beiðni fréttastofu og þetta var niðurstaðan:
„Þetta er litli frændi Spice. En hérna byrjarðu á náttúrulegum kannabínóíðum og meðhöndlar þá efnafræðilega til að fá eitthvað nýtt,“ segir Adam. Með því á hann við að munurinn á Nepal hash og Spice er að það fyrrnefnda er náttúrulegt kannabis sem er breytt til að búa til nýtt efni, það síðarnefnda er algerlega tilbúið.
Gæti verið framleitt hvar sem er
Spurður hvort Nepal hash veiti vímu segir Adam svo vera. „Já. Miðað við þær upplýsingar sem ég sé er þetta að öllum líkindum kannabínóíði sem heitir Tetróhýdrakannabínólasetat. Og er virkt, þannig að sá sem neytir þessarar vöru ætti að finna fyrir áhrifum.“
Er þetta efni löglegt eða ólöglegt á Íslandi? „Ef þetta reynist vera það sem okkar gagnasöfn benda á að þetta sé, þá er þetta í reglugerð um ávana- og fíkniefni, þessi afleiða.“
Spurður hvar þessi efni séu framleidd, segir Adam það vera mjög misjafnt. „Þetta gæti verið framleitt í bílskúr, þetta gæti verið framleitt á fínni tilraunastofu eða rannsóknarstofu. Það fer örugglega eftir aðstæðum og hver er að framleiða þetta.“
