Íslenska flugfélagið Icelandair óskaði eftir tilnefningum um versta ljósmyndara heims. 127.642 umsækjendur frá 178 löndum sóttu um og var einn valinn úr þeim hópi eftir langt og strangt ferli.
Parísarbúinn Blanche Mortemard var valinn af Icelandair. Um er að ræða hluta af Íslandskynningarherferð sem hefur náð augum tuga milljóna um allan heim. Mortemard sýndi í umsóknarferlinu einstaka hæfileika við að taka endurtekið slæmar ljósmyndir, þar sem lítið fer fyrir fókus, myndbyggingu eða lýsingu.
„Þetta hefur verið mjög skemmtilegt ferli og ánægjulegt að sjá hversu margir tóku þátt. Við settum markið hátt og bjuggumst við nokkrum tugum þúsunda þátttakenda en að um 130 þúsund umsóknir hafi borist er framar björtustu vonum. Við teljum ástæðuna fyrir árangrinum vera þá að fólk er hætt að treysta þeim gjörunnu glansmyndum sem það sér og trúir frekar myndefni sem er raunverulegra og hversdagslegra,“ segir Gísli Brynjólfsson, markaðsstjóri Icelandair.
„Vinir og ættingjar hafa oft spurt mig hvers vegna ég tek svona glataðar myndir. Það er mjög ánægjulegt að geta loksins svarað því: Ég hef verið að æfa mig fyrir einmitt þetta verkefni. Samkeppni Icelandair fagnar hinu ófullkomna og er líklega eina ljósmyndasamkeppnin sem ég hef nokkurn tíma átt möguleika á að vinna. Ég hlakka til að ferðast um landið og upplifa náttúruna. Myndirnar sem ég hef séð eru mjög fjölbreyttar – jöklar, eldfjöll, svartar strendur ogfossar en ég er ekki sannfærð um að þetta sé allt raunverulegt. Ég mun mynda af sama öryggi og atvinnuljósmyndari, án kunnáttunnar. Ef ég get gert náttúru Íslands góð skil í myndum, geta það allir,“ segir Blanche Mortemard.
Herferðin, sem staðið hefur yfir í á annað ár, hófst á hvatningu til gervigreindarfyrirtækja, samfélagsmiðla og myndabanka um allan heim um að hætta að búa til myndir af Íslandi með hjálp gervigreindar. Náttúra Íslands þyrfti ekki á lagfæringum að halda. Til þess að sanna mál sitt hóf Icelandair leit að versta ljósmyndara heims sem mun nú fara í tíu daga ljósmyndaferð um landið. Afraksturinn verður svo sýndur á ljósmyndasýningum víða um heim.
