Húsbóndaskipti urðu í bústað breska forsætisráðherrans að Downingstræti 10 í Lundúnum í dag, þegar Keir Starmer flutti þaðan og Andy Burnham, fyrrverandi borgarstjóri í Manchester og nýkjörinn þingmaður Verkamannaflokksins flutti þar inn. Bretar eru á meðal okkar næstu nágranna og helstu bandalags- og viðskiptaríkja, og því ekki úr vegi að forvitnast aðeins um þessi valdaskipti, ef það er rétta orðið, og þá sem þar eiga í hlut.
Burnham er sjöundi forsætisráðherra Bretlands á síðustu tíu árum, enginn af síðustu fimm forverum hans entist lengur en rétt rúm þrjú ár og Starmer bara tvö. Þrátt fyrir snubbótt endalok á stuttri valdatíð lýsti Starmer því yfir í kveðjuávarpi að hann gengi sáttur og brosandi frá borði, enda ánægður með það sem hann hefði þó fengið áorkað á þessum stutta tíma.
Burnham ávarpaði líka kjósendur og velunnara þegar hann kom til Downingstrætis 10 skömmu síðar. Hann lofaði miklum breytingum og boðaði tíu ára áætlun, þar sem hann hygðist umbylta hvorutveggja breskum stjórnmálum og breskum efnahag.
Húsbóndaskiptin í Downingstræti voru til umfjöllunar í Speglinum, þar sem rætt var við Kristján Guy Burgess alþjóðastjórnmálafræðing, sem þekkir vel til breskra stjórnmála. Hlusta má á þá umfjöllun í spilaranum hér að neðan.
