Hrinan á svæði þar sem líkur eru á gosupptökum - MBL.IS

Nokkrar líkur eru á gosupptökum í grennd við skjálftahrinuna sem orðið hefur á Mosfellsheiði í gær og í dag, ef marka má skýrslu Veðurstofunnar sem var birt í apríl.

Skjálftinn sem reið yfir suðvesturhorn landsins rétt fyrir klukkan 14 í dag átti upptök sín á suðaustanverðri Mosfellsheiði, skammt norður af afleggjaranum frá Suðurlandsvegi að Þrengslunum.

Skjálftinn var 4,5 að stærð og hefur fjöldi eftirskjálfta mælst í kjölfarið, nokkrir þeirra yfir 3 að stærð.

Upptök skjálftans voru ekki ýkja langt frá Hveradalabrekkunni en sífellt aukinnar jarðhitavirkni hefur orðið vart þar síðustu ár, eins og mbl.is og Morgunblaðið hafa greint frá.

Líkur á gosupptökum samkvæmt skýrslu Veðurstofu. Ath. að vegir eru svartir að lit og rafmagnslínur gular.

Mjög miklar líkur skammt frá

Í skýrslu Veðurstofunnar sem var birt í apríl er vikið að Hveradalabrekkunni þar sem nokkrar líkur eru taldar á gosupptökum þar, og mjög miklar líkur þar mjög skammt frá.

Líkur á gosupptökum eru metnar samkvæmt reiknilíkani sem byggir á gossögu og jarðfræði svæðisins.

Ekki er verið að meta hversu líklegt er að gos komi upp á svæðinu á komandi árum.