Hér látum við staðar numið í þessari fréttavakt.
Eftir snerru dagsins hafa Íranar og Ísraelar látið af eldflaugasendingum sín á milli. Íranar hófu árásir í gær, vegna innrásar Ísraela í Líbanon. Ísrael svaraði með árásum á mið- og vesturhluta Írans. Ekki hefur frést af mannfalli.
Báðir aðilar hóta því að hefja árásir af enn meiri þunga – Íranar ef Ísrael gerir árásir á Beirút, höfuðborg Líbanons, þar sem þeir segjast vera að herja á Hezbollah-hreyfinguna, og Ísrael segist á móti munu senda eldflaugar á skotmörk í Íran ef gerð verður árás á norðurhéruð Ísraels.
Donald Trump Bandaríkjaforseti hvatti ríkin til að láta af skeytasendingum.
Benjamin Netanjahú forsætisráðherra Ísraels fundar með öryggisráðuneyti sínu í kvöld.
Takk fyrir samfylgdina í dag.
Ísraelsher drap sjö manns í árásum á Líbanon í morgun, tilkynnti heilbrigðisráðuneyti Líbanons í dag. Þar á meðal var barn.
Allir biðu bana í árásum Ísraelshers á bæinn Zifta. Herinn særði átta manns í árásunum.
Ísraelsher hefur gert tæplega 3.500 loftárásir á Líbanon síðan samið var um vopnahlé 16. apríl, tilkynnti varnarmálaráðherra landsins, Michel Menassa, á ríkisstjórnarfundi í dag. Árásir Ísraela hafa verið hvað harðastar í suðurhluta Líbanons og hafa þorp og bæir verið jöfnuð við jörðu.
Ísraelar hafa að mestu hætt árásum á höfuðborg Líbanons, Beirút, en íbúar í suðurhluta landsins hafa ekki fundið fyrir því að vopnahlé hafi að nafninu til verið í gildi.
Yfir ein milljón manna, um fimmtungur landsmanna í Líbanon, er á vergangi vegna árása Ísraela sem hafa, í þessari hrinu, staðið síðan í byrjun mars.
Hezbollah hefur einnig gert árásir á norðurhluta Ísraels síðan vopnahlé tók gildi. Þær eru þó færri en árásir Ísraelshers.
Fimmtán manns hafa særst í árásum Ísraels á Íran síðan í gær, samkvæmt írönskum yfirvöldum. Enginn var drepinn í árásunum.
Ekki hafa borist fregnir af manntjóni í Ísrael eftir árásir Írans. Talið er að loftvarnakerfi í Ísrael hafi gripið allar sprengjur Íranshers.
Ísraelsher segist munu láta af árásum á Íran í samræmi við kröfu Donalds Trumps Bandaríkjaforseta. Íranar tilkynntu fyrr í morgun að þeir ætluðu að hætta árásum sem hafa staðið síðan í gær.
Báðir deiluaðilar hafa þó sett varnagla við þetta vopnahlé. Ísraelar segjast munu hefja áráisir á ný ef Hezbollah-samtökin í Líbanon geri árásir á norður héruð landsins, og Íranar segjast hefja árásir á Ísrael að nýju ef þeir síðarnefndu ráðast á Beirút, höfuðborg Líbanons.
Ísraelsher hefur skemmt minjar á heimsminjaskrá UNESCO, menningarmálastofnunar Sameinuðu þjóðanna, í árásum á borgina Tyre í suðurhluta Líbanons síðustu daga. Þetta tilkynnti menningarmálaráðuneyti landsins í morgun.
Tyre er ein elsta borgin við Miðjarðarhaf og er í um 20 kílómetra fjarlægð frá landamærunum að Ísrael. Minjar á lista UNESCO á tveimur stöðum í borginni hafa verið skemmdar í árásum.
Ísraelsher hefur gert harðar árásir á Tyre síðustu vikur. AFP hefur eftir embættismanni í Líbanon að verið sé að gera bráðabirgðamat á skemmdum en að sérfræðingar hafi ekki lagt í að mæta á staðinn vegna hættunnar sem dvöl þar hefur í för með sér.
Donald Trump Bandaríkjaforseti segir í nýrri færslu á miðli sínum Truth Social að Íran og Ísrael leiti leiða til að binda enda á átökin þeirra á milli sem hafa staðið síðan í gær.
„Lokaviðræður um „Frið“ halda áfram, nema fáfræði eða heimska þvælist fyrir.“
Trump sagði að hafnbanni gagnvart Íran yrði haldið til streitu þar til „Lokasamningur“ væri í höfn. Hann átti von á að hlutir færu að gerast hratt.
Íransher tilkynnti rétt í þessu að hann hefði hætt árásum á Ísrael í bili. Herinn varar þó við enn harðari árásum ef Ísraelar hefja á ný árásir á Líbanon.
Yfirlýsingin kom stuttu eftir að Bandaríkjaforseti krafðist þess að Íranar og Ísraelar myndu báðir hætta árásum strax.
Ekki hafa borist opinber viðbrögð frá stjórnvöldum í Ísrael við þessum vendingum.
Ísraelsher segist búast við margra daga átökum við Íran eftir að ríkin skutu hvort á annað í gær og í nótt. Þetta kemur fram í tilkynningu sem miðillinn Haaretz birti í morgun.
segir Íran hafa skotið hátt í 30 eldflaugum að landinu í árásunum í nótt. Þá hafi Hútar, bandamenn Írana í Jemen skotið tveimur flaugum að Ísrael.
Hezbollah-samtökin í Líbanon hafa hins vegar ekki gert árásir á Ísrael í dag.
Á vef Guardian er haft eftir írönskum fjölmiðlum að herinn þar hafi skotið niður dróna yfir höfuðborginni Tehran í dag. Nokkrar sprengingar hafi heyrst í borginni en ekkert manntjón hefur verið tilkynnt.
Talsmaður utanríkisráðuneytis Írans, Esmali Baghaei, segir Bandaríkin ábyrg fyrir árásarhneigð Ísraela. Þetta sagði hann á blaðamannafundi í morgun, samkvæmt írönskum fjölmiðlum. Þá sagði hann að árásir Ísraels og misvísandi afstaða bandarískra embættismanna hafi varpað skugga á viðræður.
Árásir Írans og Ísraels hafa stigmagnast síðan í gær. Baghaei sagði einnig að afleiðingar þessarar stigmögnunar eigi einnig eftir að finnast í Bandaríkjunum.
Áður en Ísraelar hófu árásir á Íran í gærkvöld bárust fregnir af því að Bandaríkjaforseti hafi hvatt Benjamin Netanjahu, forsætisráðherra Ísraels, til að hefna ekki árása Írana.
Donald Trump Bandaríkjaforseti hvetur stjórnvöld í Íran og Ísrael til að hætta strax árásum. „Ísrael og Íran verða að hætta árásum strax,“ segir Trump í færslu á samfélagsmiðli sínum Truth Social.
Fréttamaður AFP-fréttaveitunnar í Tehran, höfuðborg Írans, sagði að hávær sprenging hefði heyrst í borginni í dag. Hann sagði að í framhaldinu hefði heyrst fjöldi minni sprenginga sem hann taldi vera frá loftvarnakerfum borgarinnar.
Íranski fjölmiðillinn Mehr sagði að „bandarísk-síónískur“ dróni hefði verið eyðilagður yfir höfuðborginni en gaf ekki frekari upplýsingar.
Talsmaður íranska utanríkisráðuneytisins sagði í dag að gagnkvæmar eldflaugaárásir Írans og Ísraels gætu haft áhrif á viðræður um að binda enda á stríðið í Mið-Austurlöndum.
Esmaeil Baqaei sagði að það væri fullkomlega eðlilegt að árásirnar hefðu afleiðingar á viðræðurnar sem staðið hafa yfir. Hann tók þó fram að Íranar ætli að halda áfram að skiptast á sjónarmiðum við Bandaríkin með milligöngu pakistanskra yfirvalda.
Eldflaugaárásir Írana og Ísraela í gær og í dag hafa haft sín áhrif á markaði. Olíuverð hækkaði í morgun.
Brent-hráolía hækkaði um rúm fimm prósent í verði og kostar fatið 97,83 dollara. Olíuverð hækkaði líka á West Texas-markaðnum, um tæp fimm prósent, og kostar fatið þar 94,85 dollara.
Ísraelar segja að lítið tjón hafi orðið af eldflaugaárásum Írana í morgun. Einhverjar skemmdir hafi orðið á húsnæði á Vesturbakkanum þar sem brak féll úr eldflaugum en fólk hafi sloppið óskaddað.
Ísraelsher hefur gefið út að fólki sé óhætt að yfirgefa loftvarnabyrgi sín eftir síðustu árásina.
Fréttamenn AFP í Jerúsalem voru meðal þeirra sem leituðu skjóls í byrgjum meðan á árásinni stóð. Þeir sögðust hafa heyrt sprengingar.
Ísraelar skutu niður eldflaugar Írana.
Íranskir fjölmiðlar sögðu frá því í morgun að Ísraelar hefðu ráðist á efnafyrirtæki í suðvesturhluta Írans.
Karun efnaverksmiðjan í Mahshahr hefur verið starfrækt í rúm 20 ár og var á sínum tíma lýst sem fyrsta þekkingarfyrirtækinu til að vinna afurðir úr olíu.
Að sögn íranskra fjölmiðla voru starfsmenn látnir yfirgefa fyrirtækið. Nokkur ísraelsk flugskeyti hæfðu húsnæði þess.
Um leið og við bjóðum ykkur góðan dag hefjum við fréttavakt þar sem við ætlum að flytja ykkur tíðindi af eldflaugaárásum sem Íranar og Ísraelar hafa gert hvorir á aðra síðan í gær.
Íranar skutu eldflaugum og drónum að norðanverðu Ísrael í gær til að svara loftárásum þeirra síðarnefndu á suðurhluta Beirút í Líbanon. Þetta voru fyrstu árásir Írana á Ísrael síðan vopnahlé var gert í stríði Bandaríkjanna og Ísraels gegn Íran.
Ísraelar svöruðu með loftárásum á Tehran, Tabriz og Isfahan og sögðust hafa hæft hernaðarlega mikilvæg skotmörk. Í morgun gerðu Íranar svo aðra eldflauga- og drónaárás á Ísrael.
