Páll Vilhjálmsson skrifar:

Heimildin, áður Stundin og Kjarninn, birti nýlega frétt um dóm héraðsdóms Reykjavíkur í máli sem Páll skipstjóri Steingrímsson höfðaði gegn RÚV og Þóru Arnórsdóttur fyrir aðkomu þeirra að byrlunar- og símamálinu. Á meðan skipstjórinn var meðvitundarlaus vorið 2021 var sími hans afritaður á RÚV. Frétt unnar upp úr einkagögnum Páls birtust skömmu síðar í Kjarnanum og Stundinni.

Í frétt Heimildarinnar fyrir skemmstu sagði að Páll hefði kært „sex blaðamenn til lögreglu vegna brota gegn friðhelgi einkalífs. Blaðamennirnir störfuðu á Stundinni, Kjarnanum og RÚV.“  Staðhæfingin er efnislega röng.

Ingibjörg Dögg Kjartansdóttir.

Skipstjórinn sendi tölvupóst á Heimildina strax eftir að fréttin birtist í prent- og netútgáfu blaðsins. Hann benti á hann hefði aldrei kært blaðamenn til lögreglu. Hann kærði til lögreglu 14. maí 2021 að síma hans hefði líklega verið stolið á meðan hann var meðvitundarlaus eftir byrlun og átt hafi verið við símann. Tæpri viku síðar áttaði skipstjórinn sig á að blaðamenn voru með í spilinu og voru í sambandi við andlega veika eiginkonu hans sem játað hefur byrlunina. Daginn fyrir birtingu fréttar um skæruliðadeild Samherja vorið 2021 hringdu í skipstjórann þeir Aðalsteinn Kjartansson á Stundinni og Þórður Snær Júlíusson á Kjarnanum. Aðalsteinn og Þórður Snær hringdu í Pál með tíu mínútna millibili til að spyrja hann út í einkagögn úr síma hans er var afritaður á RÚV.

Ingibjörg Dögg ritstjóri Heimildarinnar er systir Aðalsteins, sem enn er blaðamaður á útgáfunni. Ingibjörg Dögg svaraði ekki tilmælum skipstjórans um leiðréttingu fyrr en hann hafði haft samband við fjölmiðlanefnd og kvartað undan starfsháttum Heimildarinnar, sem fær árlega um 70 milljónir króna úr ríkissjóði til að stunda blaðamennsku.

Með tölvupósti fyrir þrem vikum svaraði Ingibjörg Dögg 11 daga gömlum tölvupósti skipstjórans og kvaðst ætla að „uppfæra“ fréttina.

Í gær birtist sérkennileg leiðrétting á rangri frétt Heimildarinnar í prentútgáfu. Fyrirsögnin sjálf er kostuleg – Árétting.

Frétt um Pál Steingrímsson sem birtist í síðasta tölublaði var uppfærð. Í fréttinni var fjallað um dóm Héraðsdóms Reykjavíkur, þar sem fram kom að málatilbúnaður hans hafi „verið með öllu órökstuddur“. Fréttin var uppfærð á vef Heimildarinnar og áréttað er að dómari dró ekki í efa að sími Páls hafi verið afritaður heldur hvort hann hafi verið afritaður í heild, af hverjum og hvernig. Um leið var tekið fram að það var ekki Páll sem kærði heldur lögreglan á Norðurlandi eystra sem veitti þeim stöðu sakbornings. (feitletr. pv)

Heimildin nefnir ekki einu orði að blaðamenn, þar á meðal Aðalsteinn bróðir Ingibjargar Daggar ritstjóra, urðu sakborningar vegna rannsóknar lögreglu en ekki af þeirri ástæðu að skipstjórinn hafi kært blaðamenn. Í leiðréttingunni eru einhverjir dularfullir ,,þeir“ sakborningar. Augljóst er að ritstjórn Heimildarinnar taldi sig nauðbeygða til að leiðrétta falsfréttina þar sem fjölmiðlanefnd er með hana til rannsóknar. En það má ekki kalla hlutina réttum nöfnum. Leiðrétting skal heita árétting og blaðamenn eru ótilgreindir ,,þeir."

Byrlunar- og símamálið snýst um aðkomu blaðamanna RSK-miðla (RÚV, Stundin og Kjarninn að byrlun, símastuldi og afritun á einkagögnum. Heimildin lætur eins og einhverjir menn út í bæ eigi hlut að máli. Aðalsteinn starfar enn á Heimildinni undir ritstjórn Ingibjargar Daggar systur. Þar skrifar hann m.a. um óeðlileg tengsl fólks í atvinnulífi og stjórnmálum. Systkinin ættu að líta sér nær.