Guðný Ásta Snorradóttir varð Evrópumeistari í bekkpressu með búnaði á EM á Möltu í fyrra en í augum íslenskra kraftlyftingakvenna er Evrópa aldrei nóg svo Guðný mætti í föruneyti tíu gallharðra keppenda frá Íslandi á heimsmeistaramótið í bekkpressu í Varsjá í Póllandi, sem rann skeið sitt á enda í dag, og varð á föstudaginn heimsmeistari í bekkpressu með búnaði auk þess að setja tvö Íslandsmet í klassískri bekkpressu daginn áður.
„Í framhaldi af mótinu á Möltu setti ég ákveðinn fókus á að mæta á þetta mót,“ segir Guðný í samtali við mbl.is um glæsilegan árangur sinn í +84 kg flokki master 2 sem er aldurshópurinn 50 til 59 ára.
Guðný tók opnunarlyftu sína, þá fyrstu af þremur, í 135 kg, sigurþyngd hennar á Möltu í fyrra, og runnu þau upp sem hendi væri veifað. Raunar tryggði þessi lyfta henni heimsmeistaratitilinn en þar sem til siðs er að klára allar þrjár lyfturnar voru 142,5 kg sett á stöngina fyrir næstu atrennu sem var hennar besti árangur fram til þessa móts.
Ógild en átti meira inni
„Hún fór upp en var dæmd ógild, kom niðurhreyfing á leiðinni upp sem má ekki. En ég vissi alveg að ég ætti meira inni en fyrir þessu og þrátt fyrir að lyftan væri dæmd ógild hækkaði ég í 145 og tók það í þriðju lyftu,“ segir Guðný frá en þær voru fimm sem öttu kappi í hennar flokki og var Íslendingurinn öruggur með sigurinn, keppinautur hennar í öðru sæti lyfti mest 120 kg.
„En maður er aldrei öruggur, ég vissi náttúrulega ekkert hvað hún ætlaði að gera en svo munaði töluvert miklu hjá okkur,“ segir heimsmeistarinn nýbakaði sem segir það mikinn heiður að fá að vera í landsliði Íslands og keppa fyrir hönd fósturjarðarinnar.
„Mér finnst mjög gaman að keppa, koma á staðinn og hitta fólk sem hefur allt áhuga á því sama. Ég held að ég fari rétt með að yngsti keppandinn á þessu móti hafi verið fimmtán ára og sú elsta níræð,“ segir Guðný sem metur bekkpressuna, guðsgreinina sem Kári Elíson kraftlyftingamaður skírði svo, mest allra keppnisgreina en keppir þó hiklaust í þrílyftu, það er að segja hinum þremur greinum kraftlyftinga, bekkpressu, hnébeygju og réttstöðulyftu.
Tvö Íslandsmet „á kjötinu“
Guðný lét sér bekkpressu með búnaði – sem er svokallaður bekkpressusloppur, níðþröng flík sem gerir iðkandanum kleift að lyfta meiri þyngd en kemur þó á keppnisgrundvelli eins út fyrir alla í greininni – ekki nægja heldur keppti líka í klassískri bekkpressu, „á kjötinu“, á fimmtudaginn þar sem vöðvaaflið eitt hefur stöngina upp á gamla mátann.
Þar keppti hún í opnum flokki og náði þar öllum sínum markmiðum þrátt fyrir að fara ekki með sigur af hólmi í opna flokknum. Allar þrjár lyfturnar voru gildar og setti Guðný tvö Íslandsmet, í aldursflokkunum master 1 og master 2, það er 40 til 49 ára og sínum eigin flokki, 50 til 59 ára.
Hún er krafin skýringa á metinu í yngri flokknum.
„Ég er 53 ára og keppi í master 2 en af því að ég lyfti þyngra en í aldursflokknum fyrir neðan tekur Íslandsmetið þar yfir,“ útskýrir hún en í klassískum bekk lyfti hún fyrst 117,5 kg, þá 120, sem er Íslandsmet í M1 og M2, og að lokum 122,5 kg sem er annað Íslandsmet í sömu aldursflokkum.
Margar til kvaddar – fáar útvaldar
„Við erum mjög fáar íslenskar konur sem höfum lyft yfir 120 kílóum á móti og að brjóta þann múr var geggjað fyrir mig,“ segir Guðný sem er á leið á EM í bekkpressu í ágúst þar sem hún stefnir á að keppa aftur í opnum flokki en til þess þarf hún að hafa náð lágmörkunum til að keppa í þeim flokki og þeim hefur hún þegar náð þrátt fyrir að vera vel yfir meðalaldri í opnum flokki.
Í aldursflokknum hyggst hún keppa í búnaði hins vegar.
„Flestar sem keppna í opnum flokki í klassískri bekkpressu eru á aldrinum 24 til 39 ára, það er bilið í opna flokknum,“ segir Guðný sem æfir hjá Kraftlyftingafélagi Reykjavíkur undir vökulu auga Ingimundar Björgvinssonar þjálfara sem vakti verðskuldaða athygli sem dyravörður á Gauki á Stöng í byrjun aldarinnar undir nafninu Ingimundur gamli – eftir landnámsmanninum Ingimundi gamla Þorsteinssyni í Vatnsdal í Húnaþingi, sjálfur er Ingimundur kornungur.
„Svo stefni ég bara á fleiri mót hérna heima, Menningarbikarinn þar á meðal, þar er keppt utanhúss, og svo er þrílyftumót í haust,“ segir heimsmeistarinn. Nóg á efnisskránni.
Hvernig lá leiðin út í kraftlyftingar?
„Ég hef alltaf verið að æfa,“ svarar Guðný, „en hérna á árum áður var maður ekki að lyfta þungu, var meira í pallaleikfimi og með létt lóð, en um leið og maður fór að lyfta svona alvörustöngum fór þetta að verða virkilega gaman og eftir það var ekki aftur snúið,“ segir Guðný Ásta Snorradóttir, nýbakaður heimsmeistari í bekkpressu með búnaði, sem er komin heim frá Póllandi með gull í farteskinu og ekkert minna en hrikalega góðar tölur af mótinu, með sem án búnaðar.
