Á fimmtudagskvöldið næsta mun dr. Guðni Th. Jóhannesson, fyrrverandi forseti Íslands og prófessor við Háskóla Íslands heiðra Bókaklúbb Spursmála með nærveru sinni. Mun hann þar ræða þorskastríðin. Nánar tiltekið tímabilið frá 1961-1971 þegar ákveðin stund milli stríða gafst og rétt í þann mund sem stjórnvöld færðu landhelgina fyrst út í 50 sjómílur og að lokum 200.
Bókin Stund milli stríða
Til grundvallar samtalinu verður bókin Stund milli stríða sem kom út árið 2022 hjá Sögufélaginu en hún hefur verið til umfjöllunar í Bókaklúbbnum þennan mánuðinn.
Guðni hefur á umliðnum áratugum stundað rannsóknir á þessu mikilvæga tímabili í sögu lýðveldisins sem án nokkurs vafa hefur mótað sjálfsmynd Íslendinga með afgerandi hætti.
Hann vinnur enn að rannsóknum og skrifum á þessu sviði.
Hefst klukkan 20.00
Viðburðurinn fer fram klukkan 20.00 í bókaverslun Forlagsins að Fiskislóð 39. Allir klúbbmeðlimir eru velkomnir en nauðsynlegt er að skrá sig til þátttöku hér.
Í Spursmálum á föstudag verður svo tilkynnt hvaða bók verður tekin fyrir í Bókaklúbbnum í júnímánuði. Bækur sem fjallað er um á vettvangi klúbbsins eru á sérstöku tilboðsverði í verslunum Pennans.
