Bandaríska kvenréttindakonan og blaðamaðurinn Gloria Steinem er látin, 92 ára að aldri. Hún var ein af leiðtogum kvenréttindahreyfingarinnar í þeirri réttindabaráttu sem hófst á sjöunda áratug síðustu aldar.
Steinem lést á heimili sínu í New York í gær. Í tilkynningu Gloriu Steinem stofnunarinnar segir að hennar nánustu hafi verið við hlið hennar þegar hún lést. Ekki kom fram hver dánarorsök hennar var.
Steinem vakti athygli sem baráttukona þegar önnur femínistabylgjan hófst í Bandaríkjunum upp úr 1960. Hún hélt áfram baráttu sinni fram undir það síðasta. Hún skrifaði greinar, kom fram opinberlega og skipulagði hreyfingu til að styðja konur til áhrifa.
Hún hlaut fjölda viðurkenninga fyrir baráttu sína frá stofnunum, samtökum og fjölmiðlum víða um heim.
Meðal þeirra hreyfinga sem Steinem átti þátt í að stofna var Ms. Foundation for Women sem tók að sér að styrkja hópa sem unnu að því að efla konur og stúlkur þvert á kynþátt og stétt. Þau samtök voru stofnuð 1972 og 20 árum síðar áttu þau frumkvæðið að degi þar sem fólk var hvatt til að taka dætur sínar með í vinnuna.
