Maður þarf ekki að vera glæsimenni í smókingjakka og drekka martíní til að verða njósnari. Leyniþjónusta Finnlands ætlar að fjölga útsendurum sínum og hefur auglýst eftir ósköp venjulegu fólki. Það er kostur að tala kínversku eða rússnesku og eldri borgarar eru velkomnir.
Margt hefur breyst í Finnlandi frá því að Rússlandsher hóf innrásarstríð í Úkraínu. Finnar, sem eiga yfir 1.300 kílómetra löng landamæri að Rússlandi, eru komnir í Atlantshafsbandalagið og ætla að fjölga í leyniþjónustunni. „Aldur skiptir ekki máli. Þú getur verið mjög fær í starfinu á efri árum. Við þurfum fólk sem er ekki dæmigert leyniþjónustufólk heldur fólk sem getur haft eðlileg samskipti við annað fólk og ferðast milli staða og aðlagast ólíkum aðstæðum,“ Pekka Hiltunen hjá leyniþjónustu Finnlands.
Ráðist var í kynningarátak fyrr á árinu til að hvetja sem flesta til að sækja um. Sérstaklega er leitað að fólki sem talar erlend tungumál reiprennandi, mikill kostur er að tala rússnesku eða kínversku.
Kynningarátakið þykir stefnubreyting frá því sem áður var þegar meiri leynd hvíldi yfir starfsemi leyniþjónustunnar. Ráðningarferlið er í fullum gangi. Nærri 3.000 manns, hvaðanæva að í Finnlandi, sóttu um.
Það var ekki hægt að sækja um á netinu, heldur varð að senda umsóknir í pósti, svo ekki yrðu til nein rafræn fótspor eftir þær.
